Հայաստանի դեմոկրատական կուսակցությունն այսօր հայտարարեց, որ իր նախընտրական խոստումների և ծրագրերի իրականացման համար ընտրել է հասարակական խորհրդարան ձևավորելու ճանապարհը: ՀԴԿ նախագահ Արամ Սարգսյանը նշեց. «Մենք եկել ենք այն եզրակացության, որ կուսակցությունը ևս հինգ տարի ձեռքերը ծալած չպետք է նստի և սպասի մյուս ընտրություններին: Ուստի հասարակական խորհրդարանի միջոցով մենք պետք է տարբեր խնդիրներում փոփոխություններ առաջարկենք կառավարությանը և խորհրդարանին: Այդ աշխատանքները կատարելու համար արդեն ձևավորվել են հանձնախմբեր՝ սոցիալական, տնտեսական, կրթության, գիտության և մշակույթի, արտաքին հարաբերությունների»:
Ա. Սարգսյանի փոխանցմամբ՝ իրենց համար կարևորագույն խնդիրներից է ԼՂՀ հարցի կարգավորումը: ՀԴԿ ղեկավարն այս կապակցությամբ հետևյալ կարծիքը հայտնեց. «Մենք այս հարցում մեկը մյուսի հետևից ձախողումներ ենք արձանագրում»:
Aravot.am-ի դիտարկմանը՝ գուցե ՀՀ քաղաքական վերնախավը զբաղված է ներքաղաքական խնդիրներով, այդ պատճառո°վ ինչպես որ հարկն է չի կարողանում զբաղվել արտաքին քաղաքական հարցերով: Ա. Սարգսյանը նկատեց. «Գոնե ներքաղաքական հարցերով զբաղված լինեին: Ախր ավելի ճիշտ նրանք նեղ-քաղաքական հարցերով են զբաղված»:
ՀԴԿ ղեկավարը տեղեկացրեց, որ հասարակական խորհրդարանը զբաղվելու է նաև սահմանադրական փոփոխությունների հարցերով, մասնավորապես ՀՀ-ն որպես սոցիալական պատասխանատվություն կրող երկիր դարձնելու խնդրով: Հասարակական խորհրդարանի քննարկումներին կհրավիրվեն նաև մյուս քաղաքական կուսակցությունները, մասնավորապես նրանք, որոնց մի կերպ տարան խորհրդարան:
Կարդացեք նաև
Ա. Սարգսյանի կարծիքով՝ այդ կուսակցությունները, որոնք մի կերպ են հայտնվել խորհրդարանում, առանձնապես չեն տարբերվում Դեմկուսից, քանի որ, միևնույն է, խորհրդարանում չեն կարողանալու իրենց ծրագրերը այդպիսի փոքր ներկայացվածությամբ իրագործել:
Տաթև ՀԱՐՈՒԹՅՈՒՆՅԱՆ
