Շատերի ու այդ թվում նաեւ «Հանրապետություն» կուսակցության քաղխորհրդի անդամ եւ իրավապաշտպան Արտակ Զեյնալյանի համոզմամբ՝ DIY բարի վրա կատարվող հարձակումներն ու սեռական փոքրամասնությունների նկատմամբ անհանդուրժողականությունը դրսեւորվում են իշխանությունների թողտվությամբ: Ո՞րն է դրա նպատակը: Ինչո՞ւ պիտի իշխանությունը հրահրի կամ խրախուսի այսօրինակ վարքագիծն ու հարձակումները, կամ ինչո՞ւ չի կասեցնում այդ գործողությունները: «Որովհետեւ իշխանությունները լեգիտիմ չեն: Նրանք սա ուղղակի կամ անուղղակի, գիտակցաբար կամ անգիտակցաբար անում են իրենց իշխանությունը պահելու համար: Սա ավտորիտար ռեժիմներին եւ բռնատիրություններին բնորոշ վարքագիծ է: Համացանցում տեսանյութ կա, որտեղ Բաքվում ընդդիմադիրների ցույցերը շատ դաժան ձեւով ճնշվում են, մարդիկ են ձերբակալվում, բայց Իրանի դեսպանատան առջեւ անցկացվող ցույցը ոստիկանների կողմից ուղղակի կազմակերպվում է, դրա անցկացմանն աջակցություն է ցուցաբերվում ամենամանրակրկիտ ձեւով: Մենք, ստացվում է՝ ադրբեջանցիներից ոչնչով չենք տարբերվում. նույն աշխատաոճն է, նույն վարքագիծը»,- տարակուսեց Արտակ Զեյնալյանը:
«Առավոտ» օրաթերթ
