«Մեր ստացած ձայներն ավելի քիչ էին, քան անդամները, քանի որ շատ մարդիկ տուրք տվեցին ընտրակաշառքներին», հայտարարել է ՕԵԿ փոխնախագահ Մհեր Շահգելդյանը։
«ՉԻ» – Պրն Շահգելդյանն, իհարկե, դժգոհելու տեղ ունի, նրա կուսակցական ընկերները կանխիկ փողը գերադասել են բնամթերքից եւ դրանով իսկ դավաճանել կուսակցության վեհ գաղափարներին։ Բայց մեզ այլ հարց է հետաքրքրում՝ կոնկրետ ովքե՞ր են ընտրակաշառք բաժանել ՕԵԿ անդամներին։ ՕԵԿ-ն այս մասին ոչինչ չի ասում, եւ տպավորություն է ստեղծվում, թե Հայաստանում ընտրություններից առաջ ինչ-որ այլմոլորակայիններ են հայտնվել, արագ-արագ կաշառել ՕԵԿ-ականներին ու վերադարձել տիեզերք։
Դատախազությունն, ի դեպ, պարտավոր է անմիջապես քրեական գործ հարուցել եւ հարցաքննել Մհեր Շահգելդյանին, որովհետեւ եթե ՕԵԿ-ը 220 հազար անդամ ունի, բայց 80 հազար ձայն է ստանում, նշանակում է՝ չար ուժերը միանգամից 140 հազար հոգու կաշառել են, իսկ դա շատ լուրջ հանցագործություն է։ Հուսով ենք՝ ՕԵԿ փոխնախագահը կոնկրետ փաստեր կներկայացնի հանցագործության վերաբերյալ, եւ հաջորդը կհարցաքննվի Սերժ Սարգսյանը:
«Չորրորդ ինքնիշխանություն»
