Նվարդ Մանասյան
Aravot.am-ը տեղեկացրել է , որ Բրյուսովի անվան պետական լեզվաբանական համալսարանում վարչական պաշտոն զբաղեցնող մի խումբ անձինք այսօր դիմել են ռեկտորի ժամանակավոր պաշտոնակատար Գայանե Գասպարյանին` հրաժարվելով վարչական պաշտոններից: Նրանց թվում են՝ ԵՊԼՀ ռեկտորի խորհրդական, գիտխորհրդի անդամ Դավիթ Հովհաննիսյանը, ԵՊԼՀ ուսումնական գծով պրոռեկտորի ժ/պ, գիտխորհրդի անդամ Գոհար Ավետիսյանը, ԵՊԼՀ գիտության եւ միջազգային հարաբերությունների գծով պրոռեկտորի գիտության գծով տեղակալի` գիտական մասի ղեկավար, գիտխորհրդի անդամ Նունե Դիլանյանը, ԵՊԼՀ մագիստրոսական եւ հետբուհական ծրագրերի ղեկավար, գիտխորհրդի անդամ Լիանա Պետրոսյանը, ԵՊԼՀ որակի ապահովման կենտրոնի ղեկավար, գիտխորհրդի անդամ Նվարդ Մանասյանը:
Երբ հետաքրքրվեցինք՝ մի՞թե ռեկտորի անձը նշանակություն ունի համալսարանում աշխատելու համար, Դավիթ Հովհաննիսյանը Aravot.am-ի հետ զրույցում ասաց, որ վարչական պաշտոնից հրաժարվում է, բայց ժամավճարով հաճույքով կցանկանա շփվել ուսանողների հետ: Նա նաեւ թվարկեց պատճառներից մի քանիսը, որոնցից բխում է իր հրաժարականը. «Ի՞նչ կարծիքի եք՝ համալսարան կարո՞ղ է ոստիկան մտնել, համալսարանը կարո՞ղ է մանր- մունր ղեկավարման առարկա դառնալ…»:
Նվարդ Մանասյանն (լուսանկարով) էլ մեզ հետ զրույցում նշեց, որ ամեն ինչ ասված է իրենց հաղորդագրության մեջ, ապա հավելեց. «Սահմանադրությո՛ւն է խախտվում, քի՞չ բան է դա…Բուհն է արդեն քայքայվում, իր ներսի ամբողջ կառուցվածքն ու անկախություն է քայքայվում եւ դա արվում է նույն անձանց ձեռքերով: Կներեք, բայց այն մարդիկ, ովքեր ազատվել են, նրանցից ոչ մեկը պատրաստ չէ համագործակցել անօրինականության հետ, մենք պայքարում ենք եւ պայքարելու ենք դրա դեմ»:
Գոհար ՀԱԿՈԲՅԱՆ
