Ընդամենը մի քանի օր առաջ, քարոզարշավի ժամանակ, իրենց` ժողովրդի ծառան համարող իշխանավորները, ընտրվելուց հետո կրկին արտոնյալի կարգավիճակ ստանձնեցին: Եթե նախագահականի «Ջիփ»-երից բաղկացած ավտոշարասյունը, անվտանգության նկատառումներից ելնելով, կարող է կանգ չառնել ու անցնել կարմիր լույսի տակով, ապա անհասկանալի է, թե ինչո՞ւ են ՀՀ նախագահի եւ նրան ուղեկցող ավտոմեքենաները փողոցներում երթեւեկում լուսաձայնային այդքան բարձր ազդանշանով` քաղաքացիներին պատճառելով սթրես, անհանգստություն: Հատկապես, որ բարձրաստիճան շարասյան համար ճանապարհային ոստիկանները նախապես ճանապարհ են բացում` հրահանգելով փողոցի ավտոմեքենաներին չքվել իշխանավորների ճանապարհից: Ամեն անգամ, երբ նախագահն անցնում է որեւէ փողոցով, մայթերով քայլող քաղաքացիներից սկսած, մինչեւ փողոցների եզրին գտնվող շենքերի բնակիչներ ստիպված են այդ անհարմարությունների միջով անցնել:
Բացառություններ չեն նաեւ միջմարզային ճանապարհները:
Կիրակի օրը` ժամը 16-ի սահմաններում, նման պատկեր է եղել նաեւ Սեւանի մայրուղում: Սեւան տանող ճանապարհին, որը, մասնագետների գնահատմամբ, բավականին բարդ ռելիեֆ ունի, ինչով էլ պայմանավորված են այդքան մեծ թվով վթարները այդ մայրուղում, երթեւեկությունը կաթվածահար է եղել: Ականատեսները պատմում են, որ այդ ճանապարհի ավտոմեքենաները ստիպված են եղել աջ ու ձախ «ծեփրտվել պատերին»՝ նախագահականի շարասյանը ճանապարհ տալու համար: VIP շարասյունը Սեւանի ճանապարհին եւս երթեւեկել է բավականին բարձր ազդանշաններով:
Լուսինե ԲՈՒԴԱՂՅԱՆ
