«Առանձնակի սեր եմ տածում հայրենի հանդիսատեսի նկատմամբ, քանի որ արվեստն ընկալելու գործում այլ կրթություն եւ մոտեցում ունի: Բացի այդ, տեղի հանդիսատեսը հասկանում է արեւելահայերենը, ի տարբերություն մյուս հայաշատ երկրների հանդիսատեսի»,-այսօր «Ani Plaza Hotel»-ի «Press Master» մամուլի ակումբում ասաց ամերիկաբնակ դերասանուհի Մարի Ռոզ Աբուսեֆյանը:
Երեկ նա Կ. Ստանիսլավսկու անվան ռուսական դրամատիկական թատրոնում հանդիսատեսի դատին հանձնեց «Տիգրան Մեծ» մենաներկայացումը: «Ձայնային չնչին միջամտությամբ ներկայացման այդ տեսակը նորույթ է թատերական արվեստում եւ դժվար ներկայանալի: «Սովորաբար, մարդիկ մտածում են՝ եթե թատրոն չի, ուրեմն ասմունք է, բայց ես միայն արվեստ եմ ցուցադրում՝ փորձելով այն ընկալելի դարձնել հանդիսատեսին»,-ասաց դերասանուհին:
Խոսելով «Տիգրան Մեծից»՝ Մարի Ռոզ Աբուսեֆյանը նշեց, որ այն քաղաքական բնույթ ունի, եւ ասելիքը համատեղելի է ներկայիս իրականությանը:
Ներկայացման կազմակերպիչ Գրետա Սահակյանը նշեց, որ ֆինանսական առումով նույնիսկ մեկանգամյա ներկայացումն էր դժվար կազմակերպել, չնայած այն հանգամանքին, որ դահլիճը լեփ-լեցուն էր. «Հանդիսատեսն առաջին իսկ պահից դարձավ մեկ մարմին, ձուլվեց դերասանուհու հետ՝ նրա հետ միասին շնչելով-արտաշնչելով մինչեւ վերջ»: Գ. Սահակյանը հավելեց, որ ձգտել է գլխավորապես երիտասարդներին «բերել» թատրոն, ովքեր նախապես հետաքրքրված են եղել «Տիգրան Մեծով»:
Կարդացեք նաև
Մ. Աբուսեֆյանը նշեց, որ այժմյան հանդիսատեսը թատրոնում ցանկանում է տեսնել հիմնականում տեխնիկական նորամուծություններ ֆիլմերից. «Սկզբում մտածում էի «Տիգրան Մեծի» երթը ֆիլմաշարով ցուցադրել, բայց հնարավորությունները թույլ չտվեցին: Զարմացա, որ թատրոնն անգամ գահ չունի, ուստի դրան փոխարինեց բազկաթոռը»:
Նշենք, որ դերասանուհին ապրիլի 24-ին էլ Բեյրութում ներկայացրել է «Գրիգոր Զոհրապ. Գողգոթայի ճանապարհին» բեմադրությունը: «Մեր պետությունը Թուրքիայի նկատմամբ պահանջատիրությունը պետք է դարձնի պետական ծրագիր, քանի որ գրեթե 100 տարի է, որ ոչինչ չենք արել, մինչդեռ ամբողջ աշխարհը գիտի ցեղասպանության մասին»:
Դերասանուհին հավելեց, որ Դուբայի 500 հոգանոց հայ համայնքը հայրենիք վերադառնալու փոխարեն շենացնում է տեղի անապատները, իսկ խնդրով առաջնահերթ պետք է մտահոգվի Հայաստանը. «Եթե մարդ չի աճում իր հողի վրա, չի կարող լիարժեք հայ մնալ: Այսօր է՛լ չկա արեւմտահայ մշակույթ եւ մտածողություն, իսկ սփյուռքահայ սերունդը ոտնատակ է գնում»:
Լուիզա ՍՈՒՔԻԱՍՅԱՆ
