Ռուբեն Այվազյան
«Վարկած» մամուլի ակումբում լրատվամիջոցներին այսօր հանդիպած իրավագետ Ռուբեն Այվազյանը տեղեկացրեց 82-ամյա հոր՝ Լեւի Այվազյանի մահվան հանգամանքները:
Նա մեղադրում էր բժիշկ Տիգրան Այյանյանին, որն, ի դեպ, կամավոր ներկայացել էր այսօրվա հանդիպմանը:
Ռ. Այվազյանը տեղեկացրեց, որ Երեւանի քաղաքապետի թիվ 10/Ա-2825 ուղեգրով հորը տրվել է անվճար բուժման հնարավորություն թիվ 3 կլինիկական հիվանդանոցի սրտաբանական բաժնում:
«Պայմանավորվածության համաձայն, սրտաբանական բաժնում հորս «բուժող» բժիշկ նշանակվեց Տիգրան Կարենի /ազգանունը անհայտ/, որն առանց որեւէ հետազոտության՝ որոշեց, որ իբր որովայնի շրջանում առկա է 15-20 լիտր հեղուկ: Բժիշկ Տիգրանը չունենալով ուրոլոգի կամ նեֆրոլոգի համապատասխան որակավորում՝ սկսեց հորս օրգանիզմի ջրազրկումը: Հորս նշանակվեց մեծ քանակության ջրազրկող ֆուրասեմիդ:
Կարդացեք նաև
Ես բողոքեցի, որ ֆուրասեմիդի չափաբաժինը պակասեցվի, հորս նշանակվի այլ դեղորայք: Սակայն բժիշկը ասաց, որ բացի ֆուրասեմիդից՝ այլ ներերակային դեղ չի սրսկվել»,- ասում էր Ռ.Այվազյանը: Նա նաեւ հայտնեց, որ սխալ բուժման հետեւանքով հայրը կլինիկական մահ է տարել, ապա մահացել:
Նա ասաց, որ դիմել է ՀՀ նախագահին, ՀՀ ոստիկանապետին, գլխավոր դատախազին, առողջապահության նախարարությանը, կառավարությանը, մարդու իրավունքների պաշտպանին, 10 կառույցների:
Առաջին պաշտոնական պատասխանը Ռ.Այվազյանը ստացել էր ՀՀ կառավարությունից: Ի դեպ, այս հանդիպման մասին տեղյակ էր պահվել առողջապահության նախարարությանը, որի էթիկայի հանձնաժողովում քննվելու է բժշկի հարցը:
Տիգրան Այյանյան
Բժիշկ Տիգրան Այյանյանը Aravot.am»-ի հարցին, թե հրավիրվե՞լ է հանձնաժողով, իրավապահ մարմին, ասաց՝ դեռ չէ: Բժիշկն ասաց, որ հասկանում է Ռուբենին որպես որդու, որը փորձել է փրկել հոր կյանքը, սակայն նրա հետ համաձայն չէ: Նա ասաց, որ հիվանդին իր մոտ են բերել սայլակով, որ հիվանդի համար իրեն խնդրել է Ռուբենի հորեղբայրը:
Մեր հարցին, թե ինչպե՞ս էր հիվանդի վիճակը, երբ բերվեց իր մոտ՝ բժիշկը պատասխանեց. «Ծանր էր, շատ ծանր: Դեռ չպառկեցրած անկողնում, սկսեցինք նրան հետազոտել: Սրտային անբավարարություն էր մոտը, միակողմանի արյան հոսքը չէր ապահովվում»:
Ռուբեն Այվազյանն ասում էր, որ հայրն ինքն իր ոտքով է գնացել բուժհիմնարկ, մինչդեռ բժիշկն ասում էր՝ սայլակով է բերվել:
Ռուբեն Այվազյանն ասում էր, որ հոր մոտ չէր կարող 15-20 լիտր հեղուկ լինել, իսկ բժիշկն ասաց, որ ամբողջ օրգանիզմում կար մինչեւ 20 լիտր հեղուկ, այտուցված էր որովայնի շրջանը:«Վերջին 10 օրում հիվանդը նստած է եղել:Առաջին օրը կշռել ենք նրան:1800 մեզ տալուց հետո հիվանդի վիճակը լավացավ, կիսանստած մի քանի ժամ քնեց»,-հավելեց նա:
Բժիշկը նաեւ ասաց, որ հիվանդի տղայի կողմից արգելվել է հետագայում միզամուղ տալը: Մեր հարցին, թե հիվանդատերերի նմանօրինակ արգելքների ժամանակ արդյոք բժիշկն այդ մասին հայտնո՞ւմ է վերադասին, մասնագետների հետ խորհրդակցո՞ւմ է, բժիշկը պատասխանեց, որ դրա անհրաժեշտությունը չի եղել:
«Ես կարողացա համոզել հերթապահ բժշկին, որ նշանակվի գեմոդեզ-ներերակային: Պարզվեց, որ հիվանդանոցում, բացի ֆուրասեմիդից, այլ դեղ չկա: Շտապ 5 րոպեի ընթացքում ճարեցի նշված դեղը, որից հետո հերթապահ բժիշկը կարգադրեց, որ նշված դեղը միացվի կաթիլային համակարգով: Այս գործողություններից հետո ջրազրկումը եւ առատ քրտնարտադրությունը դադարեց, հայրս վերակենդանացավ»,- ասաց Ռ.Այվազյանը: Իսկ Տիգրան Այյանյանն ասաց.«Կլինիկական մահ չի եղել: Հիվանդատերն իրավացի չէ: Հարցրեք մասնագետներին, թե նման դեպքերում ինչպես կվարվեին նրանք:
Ինքը բերել է գեմոդեզ, մենք միացրել ենք, կաթիլներ չի գնացել»:
Ռուբեն Այվազյանը պնդում է, որ տեղի է ունեցել դաժան սպանություն, եւ բժիշկը պետք է իր գործունեության համար դատապարտվի ցմահ ազատազրկման:
Առայժմ քրեական գործ չի հարուցված, քանի որ, բացի ոստիկանապետից՝ իրավագետը ոստիկանության բաժին չի դիմել:
Ռուզան ՄԻՆԱՍՅԱՆ
