«Բիբլիական Նոյյան տապանն ամենայն հավանականությամբ գտնվում է Մեծ եւ Փոքր Արարատների միջեւ՝ ինչ-որ մի տեղ»:
Այսպիսի վարկած հայտնել է ռուսաստանցի ճանաչված ալպինիստ, Ռուսաստանի ալպինիզմի հավաքականի նախկին գլխավոր մարզիչ, նախկին ԽՍՀՄ եւ ՌԴ վաստակավոր մարզիչ, 74-ամյա Վլադիմիր Շատաեւը: «Ռեգնում» գործակալությունը տեղեկացնում է, որ նա Նոյյան տապանի որոնումներով զբաղվում է արդեն 11 տարի: Այդ ընթացքում Շատաեւը Արարատ լեռը բարձրացել է բոլոր երթուղիներով, ավելի հաճախ որոնումներ կատարել 3800-4200 մետր բարձրության վրա, որտեղ, ըստ գրավոր սկզբնաղբյուրների, հավերժական սառույցի տակ պետք է լինեն տապանի մասունքները:
Շատաեւը անցած տարվա օգոստոսին Արարատի գագաթ (5165 մետր) բարձրացել է 13-րդ անգամ: Նա նշում է, որ Նոյյան տապանն ամենայն հավանականությամբ գտնվում է Մեծ եւ Փոքր Արարատների միջեւ, որտեղ իր ենթադրությամբ գաղտնի ռեժիմի օբյեկտներ կան: Ալպինիստի պատմելով, ինքը Արարատի արեւելյան լանջին գտնվելիս անձամբ է տեսել, թե ինչպես են մեքենաները մտնում այդ գաղտնի տարածք եւ անհետանում գետնի տակ: «Այնպես որ, ոչ ոք չի կարող այնտեղ գնալ եւ որոնումներ իրականացնել»,- ասում է ալպինիստը:
Կարդացեք նաև
19-րդ եւ 20-րդ դարերում Նոյյան տապանը գտնելու հույսով բազմաթիվ արշավախմբեր են եղել Արարատ լեռան վրա: Հիմա էլ, տեղաբնակ քրդերի պատմելով, ամերիկացի մի ինչ-որ հետազոտող կա այնտեղ: Ու թեեւ այդ արշավախմբերից եւ ոչ մեկին չի հաջողվել հայտնաբերել բիբլիական տապանը, հետազոտողներից շատերը վստահեցնում են, որ տապանը հիշեցնող ինչ-որ բան հաստատ տեսել են
Ա. ՀԱԿՈԲՅԱՆ
«Առավոտ» օրաթերթ
