Եվրոպայի լիբերալ-դեմոկրատական կուսակցության՝ ELDR կայքում անդրադարձ կա նաեւ մայիսի 6-ին ՀՀ-ում կայացած ԱԺ ընտրություններին։ «Լավագույն դեպքում՝ ժողովրդավարության բեմականացում, վատագույն դեպքում՝ տոտալիտարիզմ» վերնագրով հոդվածում մեջբերվել են Երիտասարդ լիբերալների միջազգային ֆեդերացիայի IFLRY նախագահ Թոմաս Լեյսի խոսքերը, թե մայիսի 6-ի ընտրությունները չեն կարող եւ չպետք է դիտարկվեն որպես ազատ ու արդար։ «Հանրապետական կուսակցության հայտարարված հաղթանակը լավագույն դեպքում ժողովրդավարության բեմականացում էր, վատագույն դեպքում՝ անօրինական։ Ընտրությունները խաթարվեցին լայնածավալ անօրինականություններով, ներառյալ ընտրողների ահաբեկումը, ընտրակաշառքը, բազմակի քվեարկությունը եւ հարկադրանքը»,- ասել է նա։
Իսկ IFLRY անդամ կանադացի Ջեյմս Պատավան մայիսի 4-ին ՀՀԿ հանրահավաքը, որի ժամանակ փուչիկների պայթյունի հետեւանքով 144 մարդ վիրավորվեց, անվանել է զզվելի թատրոն։ «Այն սարսափելի աստիճանի սովետական էր իր ցուցադրական հանդիսավորությամբ եւ արտաքին շուքով ու չափազանց մեծ անտարբերությամբ այն մարդկանց հանդեպ, որոնք հարկադրաբար էին բերվել»,- ասել է նա։
«Ժողովուրդ»
