«Ո՞վ ա Նիկոլ Փաշինյանը, չեմ ճանաչում տենց մարդ, որ ասեք ով է` կիմանամ»,- այսօր այսպես արձագանքեց ՀՖՖ նախագահ, թիվ 1 ընտրատարածքից ընտրված պատգամավոր Ռուբեն Հայրապետյանը, երբ լրագրողները փորձեցին մեկնաբանություն ստանալ Սամվել Ալեքսանյանի` «Փարվանայում» կազմակերպած քեֆի առնչությամբ, մասնավորապես, որ հրավիրված է նաեւ Նիկոլ Փաշինյանը: Երբ լրագրողները փորձեցին «հուշել», որ Հայ ազգային կոնգրեսից է, մասնակցել է ընտրություններին` Ռուբեն Հայրապետյանը վստահեցրեց, որ չի ճանաչում, չի մտաբերում. «Էնքա~ն մարդ ա մասնակցել ընտրություններին»: Պարոն Հայրապետյանը «տեղը բերեց» Նիկոլ Փաշինյանին միայն այն ժամանակ, երբ լրագրողներից մեկը հիշեցրեց` «Ճղճղան, դուք էիք մի անգամ ասել»: «Հա~, էն լաչառ երեխե՞ն, հա ի՞նչ, թող գա, ի՞նչ ա եղել, համ էլ կդաստիարակենք միանգամից»:
Ռուբեն Հայրապետյանը նշեց, որ իհարկե, գնալու է այդ քեֆին` «Իմ ընկերն է, ո՞նց կարող է չգնամ»:
Հռիփսիմե ՋԵԲԵՋՅԱՆ
