Այսօր Հանրային խորհրդում քննարկվում էր «Հրազդան» մարզադաշտի հարցը, որին մասնակցում էին ՀՖՖ նախագահ Ռուբեն Հայրապետյանը եւ մարզադաշտի սեփականատեր Աշոտ Աղաբաբյանի ներկայացուցիչ Գագիկ Ժամհարյանը:
Քաղաքաշինության նախարարությունը քննարկելով մարզադաշտին հարակից առեւտրի կենտրոն կառուցելու վերաբերյալ հարցը՝ նշել է, որ հաշվի առնելով հասարակության լայն արձագանքը՝ առաջարկում է այդ հարցը ներկայացնել հանրության իրազեկմանը եւ քննարկումից հետո նոր միայն որոշում կայացնել:
Ազգային հարցերի ենթաhանձնաժողովների մասնագիտական հարցերի ղեկավար Գուրգեն Մուշեղյանը քննարկմանը կարծիք հայտնեց, որ ֆուտբոլում առաջընթացներ չենք ունենա, եւ որ ժամանակին Արարատ-73-ը եղել է հենց այս մարզադաշտի շնորհիվ, եւ մարզադաշտն էլ եղել է Արարատ-73-ի շնորհիվ. «Կան հստակ քաղաքաշինական նորմեր, որտեղ ասվում է, թե ինչքան տարածք է պետք յուրաքանչյուր 1000 մարդու համար՝ 7-9 քմ տարածք»: Մասնագետը նաեւ նշեց, որ եթե մարզադաշտում հրդեհ լինի՝ շատ մեծ վնասներ կարող են լինել. «Չի բացառվում: Պատմության մեջ կա, թե ինչեր են տեղի ունեցել մարզադաշտերում, քանի զոհեր»:
Ռուբեն Հայրապետյանը նշեց, որ «Հիմա էլ մարզադաշտը ժամանակակից է, մի քիչ աշխատանք տանելուց հետո կունենանք ավելի լավ մարզադաշտ: Աշնանը կունենանք շատ կարեւոր խաղ՝ Իտալիայի հավաքականի հետ, եթե չհամապատասխաներ՝ հաստատ չէր լինի այդ խաղը: Մարզադաշտը շատ կարեւոր նշանակություն ունի՝ ամեն տարի 300-400 երեխա կտրվում է փողոցից»:
Կարդացեք նաև
Ինչ վերաբերում է առեւտրի կենտրոն կառուցելուն՝ մարզադաշտի հարեւանությամբ, պարոն Հայրապետյանը նշեց, որ նույն իրավիճակը Կիեւում էր ստեղծվել՝ նախկին նախագահ Յանուկովիչի տղան էր, բայց ՖԻՖԱ-ն եւ ՈՒԵՖԱ-ն կանգնեցրեցին դա. «Աստված մի արասցե, մի բան եղավ, որեւէ բնական աղետ եղավ, մենք չենք կարող այնտեղից էվակուացնել ժողովրդին: ՖԻՖԱ-ն մեզանից նույնիսկ այնտեղ վիրահատական սենյակներ է պահանջում»:
Հռիփսիմե ՋԵԲԵՋՅԱՆ
