«Վերջին տարիների ընթացքում կրթական համակարգում տեղի են ունեցել փոփոխություններ, բայց դրանք որակապես բարձր չի կարելի համարել»,- այսօր «Հայելի» ակումբում կայացած ասուլիսի ժամանակ նման կարծիք հայտնեց «Եվրասիա» միջազգային համալսարանի ռեկտոր Սուրեն Օհանյանը: Ըստ նրա, կրթության ոլորտում իրականացվող գործընթացները դժվարությամբ են «մարսվում» հասարակության կողմից:
«Եվրասիան» նույնպես փոփոխություններ է կատարել: Դրանցից մեկն էլ օմբուդսմենի ներդրումն է համալսարանում:
Բուհի ռազմավարական գծով պրոռեկտոր Հովհաննես Հարությունյանը ասաց, որ այդ գաղափարը թույլ կտա համալսարանի ներսում ուսանողին հուզող խնդրի արագ լուծմանը. «Մենք փորձում ենք ստեղծել կառավարման մի համակարգ, որը կկարգավորի ուսանողի իրավունքները, ընդհուպ մինչև նրա վարքը: Ներդրված կառավարման համակարգի միջոցով հնարավոր է հետևել յուրաքանչյուր ուսանողի անհատական հետագծին՝ ժամանակին արձագանքելով նրա խնդիրներին և լուծում առաջարկել… Բացի օմբուդսմենի գաղափարից, այս տարի ներդրել ենք կառավարման էլեկտրոնային համակարգ, որի միջոցով բուհում նվազագույնի է հասցվել թղթարարությունը»:
Խոսելով Բոլոնյան համակարգի մասին, պրոռեկտորը փաստեց, որ դա լավ է միայն փորձի փոխանակման տեսանկյունից:
Կարդացեք նաև
Ռեկտոր Օհանյանի համոզմամբ՝ «Կառավարությունը մի քիչ շտապողականություն ցույց տվեց հավասարեցնելով պետական ու ոչ պետական բուհերի կարգավիճակը: Ուսանողը ստացել է իրեն համապատասխան սերտիֆիկատը, ուրեմն թող գնա սովորի այնտեղ, որտեղ ինքն է ցանկանում»: Ռեկտորը կարծում է, որ տարիներ հետո կվերացվի պետական ու ոչ պետական բուհ հասկացությունը:
Արամ ԱՐԱՐԱՏՅԱՆ
