«Դա թելադրում է իրավիճակը»,- Aravot.am-ի հարցին, թե hետընտրական շրջանում մի տեսակ տարօրինակ լռության ականատես չե°նք լինում՝ այսպես պատասխանեց «Քաղաքացիական հասարակության ինստիտուտ» ՀԿ խորհրդի նախագահ Արտակ Կիրակոսյանը և մանրամասնեց. «Oրինակ՝ DIY ակումբի պայթեցնելու ակունքը մաքուր հետընտրական ընթացքի մասին է խոսում: Այսինքն՝ տեսնում ենք, որ ինչ-որ ուժեր հասարակության մեջ թշնամի են փնտրում: Շարմազանովի լրիվ անհավասարակշիռ, հանցագործությանն աջակցող հայտարարությունը խոսում է այն մասին, որ իրենք էլ հասկանում են, որ մի բան այն չեղավ: Քաղաքական անբավարարվածությունը ոչ միայն ընդդիմության մոտ է, այլև՝ իրենց մոտ»: Դառնալով մեր մյուս հարցին՝ կոալիցիա կլինի՞, թե՞ ոչ, Ա. Կիրակոսյանը նշեց. «Արհեստական կոալիցիան, որը հիմա պետք է ստեղծվի երևի նախագահականում ապահովելու համար՝ դառնում է մի իրավիճակ, որը բերում է մեծ կասկածներ. ինչպե°ս եղավ, որ այսքան թիվ ստացան: Ցավոք, այսօր նորմալ քաղաքական դաշտ չունենք: Իհարկե, որպես քաղաքացի կցանկանայի, որ կոալիցիա չկազմվեր, սակայն կարծում եմ՝ այն կկազմվի»:
Ընդդիմության լռության մասին էլ Ա. Կիրակոսյանն ասաց հետևյալը. «Եթե ստանային 30 տոկոս, շատ ավելի բարձր աղմուկ կլիներ խախտումների մասով: Իրենց պարտությունն իրենց համար էլ ապշեցուցիչ էր՝ չնայած սպասելի էր, բայց միևնույն է կոնֆլիկտային իրավիճակում նման մտածողություն է լինում: Ամրոցում պաշարվածների տրամաբանություն է: Իրենք համոզված էին, որ բոլորն իրենց կողմից են: Նույն տրամաբանությունն էլ իրենց մոտ է, ախր ոնց կարող է մարդը գնա «Բարգավաճին», Հանրապետականին ձայն տա: Համոզված էին, որ ՀԱԿ-ին են տալու: Հիասթափություն»:
Դառնալով ընտրախախտումներին՝ պարոն Կիրակոսյանը նշեց, որ կուսակցությունների կողմից ահազանգերը շատ չեն եղել: Իսկ պասիվությունը նա բացատրում է այն հանգամանքով, որ քաղաքական ուժերն իրենց ուժերը խնայում են նախագահական ընտրությունների համար:
Ա. Կիրակոսյանը նշեց, որ ինքը «լիքը թղթեր ունի, անբողջը խախտումներ են, դրական բան չունի ասելու», սակայն միաժամանակ նշեց, որ ավելի քիչ ահազանգեր են ստացել, քան նախորդ ընտրությունների ժամանակ:
Կարդացեք նաև
Տաթև ՀԱՐՈՒԹՅՈՒՆՅԱՆ
