Թանգարանների եվրոպական գիշերվա պատկերը
Երեկ` 2012թ. մայիսի 19-ին, «Էրեբունի» պատմահնագիտական արգելոց-թանգարանը ժամը 18:00-ից իր դռները բացեց մեր հասարակության առջեւ` հաստատելով իր պատկանելությունը թանգարանների եվրոպական ընտանիքին: Գիշերվա մեկնարկի առաջին իսկ պահից այցելուների չդադարող հոսքը շարունակվեց մինչեւ ուշ կեսգիշեր` լույսով ու կենդանի շնչով լցնելով ոչ միայն թանգարանը, այլ նաեւ Էրեբունի ամրոցի միջնաբերդը` բոլոր երեւանցիների հպարտությունը:
Գիշերվա մեկնարկից դեռ ժամեր առաջ թանգարանի առջեւ բացվող հարթակի շուրջ հարմար դիրքավորված հարյուրավոր այցելուներ դարձան պարուսույցներ Ռուդոլֆ Խառատյանի եւ Անի Գալստյանի սաների բալետային ներկայացման հանդիսատեսը: Նրանցից շատերը թանգարանում մնացին ողջ երեկո` չկամենալով բաց թողնել իրար հաջորդող երաժշտական կատարումներից եւ ոչ մեկը: Չդադարող ծափողջույններով ընդունված «Մազուրկա» եւ «Հարաբերություններ» բեմադրություններից հետո հանդես գալով համառոտ խոսքով` Ռ. Խառատյանը նշեց, որ «սա բալետի պարողների 1-ին թանգարանային գիշերն է եւ այս մասնակցությամբ պրոֆեսիոնալ բալետը հասարակությանը ճանաչելի դարձնելու նոր ձեռնարկի մեկնարկն է տրվում»:
Կարդացեք նաև
Այցելուներից շատերին, հատկապես դպրոցահասակներին, առանձնակի աշխուժություն պարգեւեց Թաեքվոնդոյի Հայաստանի ֆեդերացիայի «Սատորի» ակումբի սաների ցուցադրական դասը` ներկայացնելով խիզախության օրինակներ ձեռքի եւ սրունքների ուժի գործադրմամբ:
Էրեբունի ամրոցի միջնաբերդին ծանոթանալուց հետո Թանգարանների գիշերվա մասնակիցներին իր համերգային ողջույնը հղեց «Փարոս» կամերային երգչախումբը` խմբավար Րաֆֆի Մելիքյանի ղեկավարությամբ: Երեկոն, որն «Էրեբունի» թանգարանում բացառապես երաժշտական էր, ավարտվեց դաշնակահար Միքայել Գաբրիելյանի եւ «Շելլ» դաշնամուրային տրիոյի անմոռանալի կատարումներով:
Ընդամենը 6 ժամ տեւողությամբ համաեվրոպական նախաձեռնությունը` Թանգարանների եվրոպական գիշերը, մայիսի 19-ին Էրեբունի» արգելոց-թանգարան է բերել 1465 այցելուների, որոնցից շատերը թանգարանից բացի բարձրացել են նաեւ ամրոցի միջնաբերդ եւ ծանոթացել հնավայրին: Տարիքային եւ հետաքրքրությունների առումով այցելուների ամենատարբեր խմբեր եւ անհատներ խոստովանել են, որ Էրեբունի ամրոց են այցելել 20-30 տարի առաջ` իրենց ծնողների կամ ուսուցիչների ուղեկցությամբ:
Թանգարանային գիշերվա հատուկ հյուրերն էին նաեւ «Մարտիրոս Սարյան» գեղարվեստի դպրոցի սաները` ովքեր հնավայրում իրականացրեցին ճեպանկարի ժամ: Արգելոց-թանգարանի հետ այս համագործակցությունը կշարունակվի նաեւ տարվա ընթացքում եւ կամփոփվի ցուցահանդեսով:
Թանգարանների գիշերվա «Էրեբունի» արգելոց-թանգարանի այցելուների թվում են եղել նաեւ ՀՀ Գլխավոր դատախազ Աղվան Հովսեփյանը, ՀՀ մշակույթի նախարարի տեղակալ Արեւ Սամուելյանը, երգչուհի Լիլիթ Պիպոյանը, ՀՀ մշակույթի նախարարության եւ Երեւանի քաղաքապետարանի պատասխանատուներ: Լիլիթ Պիպոյանը նշել է, որ «ինքն Էրեբունի է եկել Զվարթնոցից եւ վերստին հարստացած ու խաղաղված է մեր մշակութային գանձերի հետ հողորդակցությունից»:
«Էրեբունի» պատմահնագիտական արգելոց-թանգարան
