Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում է գտնվում 24-ամյա Մարիամ Պողոսյանի նկատմամբ հարուցված քրեական գործի վարույթը:
Մայիսի 30-ին նշանակվել է այս գործով դատական նիստ:
Մարիամ Պողոսյանը մեղադրվում է սուտ մատնության համար:
Երեկ մենք հանդիպեցինք Մ. Պողոսյանի հետ: Նա տեղեկացրեց, որ 2010թ. դեկտեմբերի 17-ից սկսել է աշխատել պաշտպանության նախարարության թիվ 68617 զորամասում, որպես պայմանագրային խոհարար: Նա գոհ է եղել իր աշխատանքից, ստացել է ամսական 90 000 դրամ աշխատավարձ: Չնայած Երգի պետական թատրոնում էր սովորել, բայց հիվանդ հորն ու մորը պահելու, Երեւանում վարձակալած բնակարանի կարիքները հոգալու համար ստիպված է եղել աշխատել:
Կարդացեք նաև
Մ. Պողոսյանի աշխատանքից գոհ են եղել զորամասում, անգամ նա պատվոգիր է ստացել: Սակայն Մարիամն ասում է, որ աշխատանքային գործունեությունից 4 ամիս հետո նկատում է, որ բրնձի փոխարեն ցորեն է բերվում, դիմում է պարենային ծառայության պետին, ճաշարանի պետին, թիկունքի պետին: Լարվածություն է սկսվում նրա եւ զորամասի անձնակազմի միջեւ, խորհուրդ են տալիս «Իրենց գլխից վերեւ չթռչել»:
Այս ամենն ավարտվում է նրանով, որ Մարիամին ասում են՝ դիմում գրի աշխատանքից ազատվելու համար: Բնականաբար, չի գրում, ավելին՝ մի օր էլ աշխատանքային խալաթով դուրս է գալիս զորամասից, հասնում եկեղեցու տարածք, կտրում է աջ նախաբազկի երակները: Մինչ այդ հասցրել էր երկտող թողնել ծնողներին՝ գրելով պատճառը: Այսինքն՝ ինքնասպանության փորձ է կատարում:
Ինչպես Մարիամն է պատմում, քննության ընթացքում վիրակապը թեւին, գտնվելով հոգեկան խռովքի մեջ, նրան ստիպում են՝ այլ պատճառ է նշում, հաջորդ օրը նորից պնդելով երկտողում գրածը: Դատահոգեբուժական փորձաքննության ժամանակ նա արտասվել էր, երբ հարցը վերաբերել էր ինքնասպանության փորձին, նա տվել էր իրեն նվաստացնողի անունը: Քրեական գործը կարճվում է, իսկ Մարիամին ազատում են զորամասից: Դատահոգեբուժական փորձաքննության ժամանակ 3 մասնագետներ (Ա. Գեւոգյան, Ա. Հակոբյան, Վ. Ֆրանգուլյան) ստորագրությամբ հանգել են հետեւյալին. «Դրսեւորում է հանգիստ, կոռեկտ վարք, հարցերին տալիս է ճիշտ, ըստ էության մակերսային պատասխաններ: Դիմախաղը ադեկվատ է: Գիտակցությունը պարզ է: Ցնորքներ, զառանցական մտքեր, աֆեկտիվ ոլորտի կոպիտ խախտումներ չեն հայտնաբերվել: Հիշողության խանգարումներ չկան»:
Հոգեբույժ-փորձագետները արձանագրել են, որ նա հոգեկան հիվանդությամբ չի տառապել, իսկ ինքնավնասումը «իրավիճակով պայմանավորված ռեակցիա էր»:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
