Քիչ առաջ լիբերալ կուսակցության Գյումրու կառույցի պատասխանատու Վահագն Խաչատրյանը Aravot.am-ին տեղեկացրեց, որ ինքը լքում է կուսակցությունը : Պատճառն այն է, որ նա համաձայն չէ այս կուսակցության` ՀԱԿ-ից դուրս գալու քաղաքական որոշման հետ: «Քանի որ իմ քաղաքական գործունեությունը սկսել եմ ՀԱԿ-ից , այսուհետ շարունակելու եմ ՀԱԿ-ում. հավատարիմ մնալով իմ սկզբունքներին` կանգնելու եմ հիմնադիր նախագահ Լևոն Տեր-Պետրոսյանի և ՀԱԿ-ի կողքին ու պայքարելու եմ մինչև վերջ», -այսպիսի քաղաքական հայտարարությամբ հանդես եկավ Վահագն Խաչատրյանը: Aravot.am—ի այն հարցին էլ, թե Գյումրիում կան այլ լիբերալներ, որոնք մնում են կուսակցության մեջ, Վահագն Խաչատրյանը պատասխանեց. «Գյումրիում այլևս ներկայացուցչություն չկա» :Նա նաև հավելեց, որ ինքը Գյումրու լիբերալ կուսակցության պատասխանատվությունը ստանձնել էր 4 տարի առաջ` 2008 թվականի ամառվանից, սակայն մինչ այդ եղել է ՀԱԿ-ի անդամ, և բացարձակապես մտադրություն չունի լքել այս քաղաքական ուժը:
Նունե ԱՐԵՎՇԱՏՅԱՆ
