Այս մասին Aravot.am-ի հետ զրույցում դժգոհեց Շիրակի մարզի Բասեն գյուղի ՀՀԿ-ական գյուղապետ Համլետ Պետրոսյանը: Նրա պատմելով, ինքը սկսել էր վերակառուցել 1906 թվականին հիմնված գյուղի եկեղեցին, որը ԽՍՀՄ տարիներին, մյուս բոլոր գյուղերի եկեղեցիների պես, վերածվել էր պահեստի. «Անցած տարի գնացի Ռուսաստան, հիմնականում եղա Մոսկվայում, որտեղ արտագնա աշխատանքի էին մեկնել մեր համագյուղացիները: Նրանք ոգևորված հանգանակություն կատարեցին, ով ինչքան հնարավոր էր փող բերեցին ու մասնակցեցին եկեղեցաշինությանը: Բանկում հաշվեհամար բացեցինք, 12 հոգանոց հանձնաժողով կազմեցինք, որ շինարարության ընթացքը վերահսկվի: Բայց ոտքս չէի դրել Հայաստան, օդանավակայանից ինձ ասին, թե դատախազություն ես կանչված : Երբ հարցրեցի`ինչի՞, պատասխանեցին, որ առանց թույլտվության քանդել եմ հին եկեղեցին: Ես ուղղակի զարմացած եմ, ֆինանսը բերեմ, մարդկանց մեջ հավատքը ամրապնդեմ, եկեղեցու հին շենքից տոննաներով աղբը հեռացնեմ, սուրբ գործ ծավալեմ, էսօր աղանդավորները մարդ են ուտում, որ նման կերպ վարվե՞ն»:
Համլետ Պետրոսյանի ասելով, իրեն դատախազություն տվողը եղել է ՀՀ մշակույթի նախարարությունը, թեև իր վրա քրեական գործ չի հարուցվել: «Ես չեմ սիրում օրենք շրջանցել, մեր օրենքներն են, պարտավոր ենք հարգել, բայց որպեսզի ցույց տան, որ իրենք էլ գործ են անում, իմ սկսած սուրբ գործը պիտի կասեցնե՞ն: Պատկերացրեք՝ ես չեմ կարող կանգնեցնել այդ շարժումը, գյուղացիները ձրի, իրենց ուժերով սարքում են եկեղեցին, մեկը ավազ է կրում, մյուսը պատ է շարում»:
Գյուղապետի ասելով, Շիրակի մարզի հոգևոր թեմի առաջնորդ Միքայել եպիսկոպոս Աջապահյանին ևս զայրացրել է մշակույթի նախարարության ստեղծած խոչընդոտները:
Այս թեմային առավել մանրամասն կանդրադառնանք «Առավոտի» առաջիկա տպագիր համարներում:
Կարդացեք նաև
Նունե ԱՐԵՎՇԱՏՅԱՆ
