ԱՄՆ-ի դեսպան Ջոն Հեֆերն
Հայաստանում ԱՄՆ-ի դեսպան Ջոն Հեֆերնը կարծում է, որ մայիսի 6-ին կայացած խորհրդարանական ընտրություններում մեծ առաջընթաց է արձանագրվել:
«Մենք ուշադրությամբ եւ մոտիկից հետեւել ենք ընտրություններին: Կարծում ենք, որ մեծ առաջընթաց է արձանագրվել. մեծ առաջընթաց մի քանի առանցքային ուղղություներում` լրատվամիջոցներից օգտվելու առումով վիճակը շատ ավելի լավ էր, քան նախկինում, եւ սա լավ բան է, ընտրատեղամասերում ամեն ինչ ըստ կարգի էր եւ թափանցիկ, հանձնաժողովների անդամները պատրաստված էին, ընտրատեղամասերում տեսախցիկներ էին տեղադրված: Այսինքն` շատ դրական զարգացումներ կային այս ընտրություններում», – ուրբաթ օրը «Ազատություն» ռադիոկայանի հետ զրույցում ասաց Ջոն Հեֆերնը:
Միացյալ Նահանգների դեսպանը, սակայն, չմոռացավ խոսել նաեւ ընտրություններում արձանագրված բացասական երեւույթների մասին:
«Միեւնույն ժամանակ, որոշ խնդիրներ շարունակում են մնալ, եւ ԵԱՀԿ/ԺՀՄԻԳ-ի դիտորդները դրանք հստակորեն նշել են… ընտրակաշառքները եւ վարչական ռեսուրսի չարաշահումը շարունակում են մնալ լուրջ խնդիր: Ուստի դեռ որոշակի աշխատանքի անհրաժեշտություն կա հաջորդ ընտրություններից առաջ», – ասաց նա:
Կարդացեք նաև
Հեֆերնը նաեւ տեղեկացրեց, թե իրենք աշխատում են Հայաստանի իշխանությունների հետ` ընտրություններում տեղ գտած խնդիրները վերացնելու համար:
«Մենք փորձում ենք հնարավորինս օգտակար լինել կառավարության, իշխող ու ընդդիմադիր կուսակցությունների, քաղաքացիական հասարակության ներկայացուցիչների եւ լրատվամիջոցների հետ աշխատանքում: Մենք անում ենք ամեն ինչ, ինչ կարող ենք` օգտակար լինելու համար», – վստահեցրեց ԱՄՆ-ի դեսպանը:
Սարգիս Հարությունյան
«Ազատություն» ռադիոկայան
