Ազգային ժողովի ընտրություններից 1 օր առաջ՝ լռության օրը, Հանրապետական կուսակցության համամասնական ցուցակի ներկայացուցիչներին լուսաբանելը ՀՌԱՀ նախագահ Գրիգոր Ամալյանը որպես քարոզարշավ չի դիտարկում: Այսօր լրագրողների հետ զրույցում նա հետեւյալ բացատրությունը տվեց. «Կան պաշտոնատար անձինք, որոնք իրականացնում են իրենց գործունեությունը, օրենսդրությունը հաշվի է առել սա ու ամրագրել է, որ հասարակությունը պետք է իրավունք ունենա իր պետության գործունեությանը ծանոթ լինել: Բոլոր այն դեպքերում, երբ լուսաբանումը եղել է ոչ պաշտոնական պարտականությունների շրջանակում, դասակարգել ենք քարոզարշավի եթերաժամանակում: Օրինակ՝ երբ հայկական պատվիրակությունը մեկնել էր Բաքու, երբ վերադարձավ, մի շարք հեռուստաընկերություններ մեզ ներկայացված տեղեկատվության մեջ պատգամավորներին ներկայացրել էին որպես կուսակցություններին տրամադրված քարոզարշավի եթերաժամանակ, բայց եղավ մի դեպք, երբ իսկապես, պաշտոնական գործունեություն էր, բայց կադրի ֆոնում երեւում էր կուսակցության սիմվոլիկան, դասակարգել ենք քարոզչության եթերաժամի մեջ»:
Նա նաեւ ասաց, որ այս պահին նախընտրական քարոզչության ընթացքում օրինախախտումների մասով վարույթներ չեն հարուցվել:
Արփինե ՍԻՄՈՆՅԱՆ
