Aravot.am-ը Հայաստանի կոմունիստական կուսակցության նախագահ Ռուբեն Թովմասյանից հետաքրքրվեց՝ իր կանխատեսմամբ ինչպե°ս կզարգանան կոալիցիոն համաձայնության շուրջ բանակցությունները: Պարոն Թովմասյանը նկատեց. «Պետք է հաշվի առնենք այն հանգամանքը, որ Հանրապետական եւ «Բարգավաճ Հայաստան» կուսակցությունները բավականին մեծ քանակով ձայներ են ստացել: Հանրապետականի ստացած ձայներն այնքան են, որ նա միայնակ՝ ըստ քվեարկության կարող է որոշել ողջ կառավարության, ինչպես նաև մյուս հանձնաժողովների ձևավորման հարցը: Սակայն Հանրապետականը չի կարող հաշվի չնստել ԲՀԿ-ի հետ: Ուստի, թե այս բանակցություններն ինչպես կավարտվեն, դեռ չենք կարող ասել, քանի որ երկու կուսակցությունների ղեկավարների միջև դեռ տեղի են ունենում բանակցություններ»:
Պարոն Թովմասյանը փաստում է, որ բավականին բարդ քաղաքական իրավիճակ է ստեղծվել և շարունակում. «Երկու կուսակցությունների մոտ էլ խոսում են սեփական ամբիցիաները: Թե ինչ արդյունք կտան այս բանակցությունները, կիմանանք ամսի 24-ից հետո ինչպես երեկ հայտարարեցին»:
Aravot.am-ը ՀԿԿ ղեկավարից հետաքրքրվեց՝ համամի°տ է տարածված այն կարծիքին, որ եթե ԲՀԿ-ն ՀՀԿ-ի հետ կոալիցիա կազմի, ապա կհավասարվի ՕԵԿ-ի մակարդակին: Ռ. Թովմասյանը պատասխանեց. «Ենթադրել չեմ կարող, ԲՀԿ-ն կիջնի° ՕԵԿ-ի մակարդակին, թե՝ ոչ, դա կերևա առաջիկայում»:
Տաթև ՀԱՐՈՒԹՅՈՒՆՅԱՆ
