Կամ ԱԺ նորընտիր պատգամավորները՝ մշակութային դաշտի մասին
«Առավոտը» ԱԺ ընտրություններից առաջ մշակույթի անվանի գործիչներից հետաքրքրվել էր, թե որն է իրենց ոլորտի թիվ 1 խնդիրը՝ կապված օրենսդրական դաշտի հետ, ինչը նորընտիր պատգամավորները պետք է նկատեն առաջին հերթին: Նախօրեին մենք կապվեցինք ԱԺ 5-րդ գումարման նորընտիր պատգամավորների հետ՝ հղելով հենց այդ հարցը: Ելնելով հարցախույզի պատասխաններից՝ կարող ենք փաստել, որ զարմանալի անտարբերություն է տիրում հայրենի մշակույթի նկատմամբ: Ստացվում է, որ խորհրդարանում եթե քննարկվի մշակույթին առնչվող որեւէ օրինագիծ, ապա դրանց պետք է մասնակցեն մշակութային հարցերի մշտական հանձնաժողովի անդամները, իսկ մյուսները դառնան սովորական կոճակ սեղմողներ:
Օրինակ, հանրապետական Գագիկ Մինասյանին մեր հարցը անակնկալի բերեց: Նա խորհուրդ տվեց այն ուղղել մշակույթի հարցերի մշտական հանձնաժողովի անդամներին: Հարցին՝ եթե խորհրդարանում քննարկվի «մշակութային» հարց, ինքը չի՞ սեղմելու կոճակ, պարոն Մինասյանը ծիծաղելով ասաց՝ իհարկե, պետք է սեղմեմ:
Կարդացեք նաև
Դատելով «Բարգավաճ Հայաստան» կուսակցությունից պատգամավոր Հմայակ Հովհաննիսյանի խոսքից, մեր երկրում մեծամասնությունը սիրում է ուտել-խմելու մշակույթը, իսկ բուն մշակույթի «մասով» օրենսդրական դաշտում քիչ առաջարկներ ու խնդիրներ են բարձրացվում. «Մինչդեռ մշակույթը պետք է դառնա պետական հոգածության մշտական առարկա»: ՀԱԿ-ից Հրանտ Բագրատյանն էլ, դարձյալ անակնկալի գալով իրեն ուղղված հարցից, նշեց, որ այն ուղարկենք գրավոր:
«Ժառանգության» պատգամավոր Ռուբեն Հակոբյանի պատասխանը կարճ էր. «Չորրորդ անգամ եմ պատգամավոր ընտրվում եւ համոզված եմ, որ մեր մշակույթին պետք է վերադարձնել հայրենի մշակույթի լեզուն»: ՀՀԿ համամասնական ցուցակով պատգամավոր դարձած Շուշան Պետրոսյանը համոզված է, որ ԱԺ նիստերը պետք է առանց խմբագրման ներկայացվեն լայն լսարանին, իսկ որ ամենակարեւորն է, պատգամավորը պետք է չափանիշ լինի՝ բարձր մշակույթ կրող մարդ. «Ինքս դեմոկրատ մարդ եմ ու գտնում եմ, որ մեր երկիրը առաջ կգնա ու դրսում կներկայանա իր եկեղեցով եւ մշակույթով»: «Բարգավաճ Հայաստանը» ներկայացնող Տիգրան Ուրիխանյանի խոսքերով՝ թեեւ ինքը չի զբաղվում մշակութային խնդիրներով, սակայն պետք է ամեն դեպքում կոճակ սեղմի. «Որպես լեզվաբան եւ իրավաբան, գտնում եմ, որ պատգամավորը պետք է լավ ճանաչի Բրամսին, Շոպենին, Խաչատրյանին, Մինասին… բայց երբեք չշփոթի նկարիչ Ֆերրարիին նույնանուն մակնիշի ավտոմեքենայի հետ»:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
