Շիրակի մարզի Ախուրյանի տարածաշրջանի պաշտոնապես աղքատ ճանաչված Կարմրաքար համայնքում փաստացի հաղթել է ՀԱԿ-ը: 38 ընտրող ունեցող գյուղում ընտրություններին մասնակցել է 25 հոգի, որոնցից 10-ը ձայնը տվել է ՀԱԿ-ին, 9-ը` ԲՀԿ-ին, 1-ը` կոմունիստներին, իսկ իշխող կուսակցությանը՝ ընդամենը 3 հոգի:Aravot.am-ը ընդդիմադիր գյուղապետ, ՀԱԿ անդամ Գագիկ Վարադյանից հետաքրքրվեց, թե գյուղերում ընտրությունների ժամանակ սովորաբար գյուղապետի անձն է մեծ դերակատարություն ունենու՞մ, թե՞ ընտրակաշառքը: Ըստ գյուղապետի, ընտրակաշառքը ամենամեծ դերն է կատարում, և տալն է պարտադրված, և վերցնելը, միաժամանակ շատ մեծ է պատասխանատվությունը: «Գրեթե բոլոր գյուղերում այդպես է, գյուղացին զրկված է ինքնուրույն որոշում կայացնելու հնարավորությունից: Ենթադրենք գյուղն ունի 100 հոգի, եթե 50-ին ընտրակաշառք տվեցին ու փոխարենը 30 ձայն ստացան, շատ հեշտ է պարզել, թե ո՞վ է իրենց խաբողը: Բացահայտվելու վախը միշտ մարդկանց սրտում է , իսկ դա ծանր հետևանքներ է ունենում, քանի որ ընտրակաշառք տվողները գյուղապետերն ու դպրոցի տնօրեններն են, նրանք այդ օրերին ոչ միայն թիկնապահի պես հսկում են գյուղացիներին, այլև հոգեբանական ճնշում գործադրում նրանց վրա: Օրինակ` գյուղապետը կարող է վախեցնել, թե մեր ասածը չանելու դեպքում, քեզ տեղեկանք չենք տա, կամ քեզ կզրկենք գյուղին օգնություն հատկացվող սերմացու ցորենից և այլն, և այլն: Եթե սխալվես ու հրաժարվես ընտրակաշառքից, դա նշանակում է դու գյուղապետին ընդդիմանում ես», -գյուղերում ընտրական հարաբերությունները այսպես մեկնաբանեց Գագիկ Վարադյանը: Ըստ նրա, Շիրակի մարզի գյուղերում գրանցված ընտրապատկերը վկայում է այն մասին, որ ընդամենը մեկ-երկու գյուղեր կան Ամասիայում, որոնք այսպես ասած «դուխ են» արել չընտրել Հանրապետականին, մնացածը սերտաճած են այս կուսակցությանը:Իսկ ինչպե՞ս է, որ իր ղեկավարած համայնքում հաղթել է ՀԱԿ-ը, արդյո՞ք իր գործոնը չկա:Ըստ գյուղապետի, այս փոքր համայնքում կա իր անձի նկատմամբ հարգանքի գործոնը : Ինքն ազատ է թողել գյուղացիներին, որևէ լարվածություն չի ստեղծել, հետևաբար՝ ով ում ուզել, ընտրել է: Aravot.am-ի այն հարցին էլ, թե ձեր ասածով ստացվում է, որ Հանրապետականը այս գյուղում հարգանք չունի՞, գյուղապետն ասաց. «Այո, Հանրապետականն այստեղ հարգանք չունի»:Իսկ մի՞թե ԲՀԿ-ն այդքան հարգված է , որ 9 ձայն է տարել, գյուղապետն այսպես մեկնաբանեց. «Դե որ ես ազատ եմ թողել, ինձ թույլ չեմ տվել մարդկանց կամքին բռնանալ, ԲՀԿ-ն այստեղ կազմակերպչական աշխատանքներ է տարել ու խաղեր տվել»:
Նունե ԱՐԵՎՇԱՏՅԱՆ
