Ինչի հետեւանքով բաժանորդը չի կարողանում հաշվիչի ցուցմունքին հետեւել
Ջրվեժ գյուղի գազի տեսուչն ու այդ գյուղի 70-ամյա թոշակառու Անատոլյա Խաչատրյանը երկար ժամանակ է՝ լեզու չեն գտնում: Արդեն 5 տարուց էլ ավել է՝ տիկին Անատոլյան դիմում է տեսուչին, որպեսզի իր գազի հաշվիչը փակցնի իր տան պատին, տեսուչն էլ 5 տարի է՝ պատասխանում է՝ չեմ կարող, պետք է լինի այնտեղ, որտեղ որ ներկայումս փակցված է: Տիկին Անատոլյայի ներկայացմամբ՝ երբ նոր էր գազիֆիկացրել 12/8 հասցեում գտնվող իր բնակարանը, այդ ժամանակ հաշվիչը հենց տան պատին է եղել, տիկնոջ խոսքերով ասած՝ աչքի առաջ: Սակայն մի օր տեսուչն առանց բաժանորդին տեղյակ պահելու հաշվիչը տեղադրել է մի քանի փողոց այն կողմ: «Առավոտի»-ի հետ զրույցում Անատոլյա Խաչատրյանը նշեց, որ հիվանդ է եւ տեղաշարժվելու խնդիր ունի. «Ես անկողնային հիվանդ եմ, ողնաշարի խնդիր ունեմ, եւ ամբողջ օրը պառկած եմ լինում, էլ ուր մնաց, թե կարողանամ մի քանի փողոց քայլել, որպեսզի տեսնեմ հաշվիչիս թիվը: Ձմռանը մոտ 150 հազար դրամ եմ վճարել սպառած գազի համար, ես ի՞նչ իմանամ՝ դա իրակա՞ն թիվն է, թե՞ տեսուչը «նկարել» է: Իմ աչքով չեմ տեսել: Բացի դրանից, կասկածում եմ, որ տեսուչը դիտավորյալ է այդքան հեռու տեղ տարել հաշվիչս, որ ինչ ուզի՝ անի»:
Տիկնոջ դիտարկմամբ՝ եթե, ինչպես տեսուչն է վստահեցնում, ընդունված կարգն է պահանջում, որ հաշվիչը պետք է տեղադրված լինի մի քանի փողոց հեռավորության վրա, ապա ինչո՞ւ իր անմիջական հարեւանների հաշվիչները փակցված են հենց իրենց տների պատերին. «Այն ժամանակ «ՀայՌուսգազարդի» թույլտվությամբ տունս ինչ-որ կոոպերատիվի միջոցով գազիֆիկացվեց, ու հենց իմ տան պատին էլ փակցվեց հաշվիչը: Թե ինչ անցավ տեսուչի մտքով, որ եկավ ու հենց իմ հաշվիչն ինձանից հեռացրեց, չեմ կարող ասել»:
Այս առնչությամբ «ՀայՌուսգազարդ» ընկերությունից «Առավոտին» պարզաբանեցին, որ իրենց մասնագետները կգնան, տեղում խնդիրը կուսումնասիրեն եւ մայիսի 18-ին կպատասխանեն:
Կարդացեք նաև
ՆԵԼԼԻ ԲԱԲԱՅԱՆ
«Առավոտ» օրաթերթ
