2007 թվականից մինչեւ հիմա պետբյուջեից Նոյեմբերյանի մարզադաշտի վերակառուցման համար հատկացվել է 165 միլիոն դրամ: Այդ գումարով Իջեւանի «Հայկ եւ որդիներ» արտադրական կոոպերատիվն ընդլայնել է մարզադաշտի տարածքը, հենապատեր կառուցել, խաղադաշտը ոռոգելու համար խողովակներ անցկացրել, կառուցել երկհարկանի շենք, որտեղ ֆուտբոլային թիմերի համար նախատեսված հանդերձարանները եւ երկու փոքր մարզադահլիճներ են: Նոյեմբերյանի քաղաքապետ Վանուշ Ամիրաղյանն ասաց, որ հունիսին կցանվի խաղադաշտի խոտը, եւ դրանից 15-20 օր հետո մարզադաշտը կգործարկվի:
Մարզադաշտի վերակառուցումը ձգձգվում է շուրջ 5 տարի: Դրա հետեւանքով ֆուտբոլի Հայաստանի առաջնությունում հանդես եկող Նոյեմբերյան քաղաքի մանկապատանեկան թիմը խաղերն անցկացնում է Կողբի կամ Հաղթանակի մարզադաշտերում: Մարզադաշտի վերակառուցման ձգձգման պատճառները երկուսն էին՝ բյուջեից «կտոր-կտոր» ֆինանասավորումը եւ այն, որ տարածքի հետ կապված վեճ ու դատական գործընթացներ կային քաղաքապետարանի եւ մարզադաշտի հարեւանությամբ տարածք ունեցող նոյեմբերյանցի անհատ ձեռնարկատիրոջ միջեւ:
Նոյեմբերյանի մարզադաշտի վերակառուցման համար ներդրվել է 165 միլիոն դրամ, սակայն կառուցապատման ծրագրով տրիբուների շինարարություն նախատեսված չէր: Ի՞նչ մարզադաշտ առանց հանդիսատեսների նստելատեղերի: Հարկ էր ծրագիրը հաստատելուց, շինարարական աշխատանքները սկսելուց առաջ հանրային քննարկում կազմակերպել, արծարծել խնդրի հետ առնչվող բոլոր հանգամանքները: Ցանկացած շինարարություն, կառուցապատման ծրագիր վերջնարդյունք է ունենում, այս դեպքում…
Կարդացեք նաև
Նոյեմբերյանի քաղաքապետ Վանուշ Ամիրաղյանն ասաց, որ մարզադաշտի տրիբունաների կառուցման հարցով դիմելու է Տավուշի մարզպետ Արմեն Ղուլարյանին:
Ոսկան ՍԱՐԳՍՅԱՆ
