ԺՈՒԿ նախագահ Մանուել Գասպարյանի հարցազրույցը:
– ԱԺ ընտրությունների վերաբերյալ Ձեր հայտարարությունը փաստում է այն, որ Դուք դժգոհ եք ՀԱԿ–ի գործունեությունից եւ որոշել եք դուրս գալ այդ դաշինքից։
– Դա ընդամենը մեր քննարկումների արդյունքն էր։ Մեր քաղխորհուրդը դեռեւս չհ գումարվել, եւ ոչ մի նման հարց չի քննարկվել։ Մոտակա օրերին կլինի նման քննարկում, բայց օրակարգում դեռեւս նման հարց չունենք դրված։
Կարդացեք նաև
– Համաձայն տարածված տեղեկությունների՝ ՀԱԿ–ից դժգոհություններ ունեք, եւ լուրջ տարաձայնություններ կան Ձեր եւ նրանց միջեւ։
– Դժգոհություն, ասենք, ինչպես ժողովոդի մեջ է, այդպես էլ կուսակցության մի շարք անդամների մոտ՝ կապված այն բանի հետ, որ հանրահավաքները չշարունակվեցին։ Մարտավարության եւ ռազմավարության որոշ քայլեր դժգոհություն առաջացրել են։ Բայց դա չի բերում նրան, որ մենք այսօր քաղխորհրդում այդ հարցը քննարկենք՝ ՀԱԿ-ից դուրս ենք գալու, թե մնալու ենք։ Առայժմ նման կարծիք չկա, այդ հարցը… ժամանակը կբերի դրան։ Առայժմ մենք մնում ենք Կոնգրեսի մաս կազմող ուժ։ Մենք դիմել ենք դատարան ընտրություններն անվավեր ճանաչելու վերաբերյալ, այժմ մենք այդ գործընթացով ենք զբաղված։
– Ձեր կարծիքով՝ պե՞տք չէր այդ մանդատները վերցնել եւ ԱԺ մտնել։
– Մենք ցանկանում էինք, որ ամեն տեղ դիմեինք, բոլոր ատյաններին ներկայացնեինք ընտրությունների արդյունքները եւ փորձեինք ապացուցել, որ ընտրությունները կեղծվել են։ Մեր տարաձայնությունը կոնկրետ այս քայլի համար էր, այն հանրահավաքի ժամանակ, երբ հայտարարվեց, որ մենք վերցնում ենք մանդատները։ Կարելի էր ամեն ձեւ պայքարել, հետո նոր տեսնել, թե ինչ կարելի Է անել։ Ընդամենն այսքանը։
– Եթե ԺՈՒԿ–ը, ի վերջո, որոշի դուրս գալ ՀԱԿ–ից, Ձեր հետագա գործունեությունն ինչպիսի՞ն է լինելու։
– Դուրս էլ գանք, դուրս էլ չգանք՝ մենք պայքարող ժողովրդի կողքին ենք լինելու:
Սոնա ԳՐԻԳՈՐՅԱՆ
«Ժողովուրդ»
