Նյու-Յորքում գտնվող «Հայ հոմոսեքսուալների եւ լեսբուհիների ասոցիացիան» (ՀՀԼԱ) քիչ առաջ հայտարարություն է տարածել, որում դատապարտում է DIY բարի պայթեցումը մայիսի 8- ին եւ դրան հետեւած ատելության քարոզչությունը: Հայտարարության մեջ ասված է, որ դատապարտում են նաեւ սոցիալական ցանցերով եւ մամուլի միջոցներով փոքրամասնությունների հանդեպ տարածվող բանավոր կամ գրավոր հարձակումները, այլ ոտնձգությունները:
Հայտարարության մի առանձին հատված է ուղղված ՀՅԴ պատգամավոր Արծվիկ Մինասյանին պախարակելուն, որի մտքերը` DIY ակումբի եւ այն պայթեցնողների մասին, «առավել արգահատելի» են համարվում: Հայտարարության մեջ անդրադարձ կա պատգամավորի այն մտքին, թե «Ծոմակի նմանները ոչնչացնում են հայ հասարակությունը»: Ըստ ՀՀԼԱ-ի` «Նման հայտարարությունները կարող են օգտագործվել արդարացնելու բռնի գործողությունները հարյուրավոր, եթե ոչ հազարավոր խաղաղ եւ օրինապահ քաղաքացիների հանդեպ»:
ՀՀԼԱ-ն զարմանում է, որ մինչեւ օրս ոչ ՀՅԴ-ն ոչ ՀՀ կառավարությունը որեւէ հետաքննություն չեն սկսել Արծվիկ Մինասյանի ասածների կապակցությամբ: Ասոցիացիան անգամ կոչ է անում ՀՅԴ-ին եւ Ազգային ժողովին` նկատողություն անել Մինասյանին, պաշտոնանկ անել կամ առաջարկել, որ հրաժարական տա` կոնֆլիկտ հրահրելու եւ մարդկանց կյանքին վտանգ սպառնալու համար, առավել եւս որ Մինասյանը, ըստ ՀՀԼԱ-ի, շարունակում է ճչացող հոմոֆոբիկ հայտարարություններ անել` ՀՅԴ դրոշի ներքո:
Հայտարարության մեջ նշված է, որ այսօր` մայիսի 17 – ին, Հոմոֆոբիայի դեմ պայքարի միջազգային օրը, ՀՀԼԱ-ն իր զորակցությունն է հայտնում Հայաստանում գործող մի շարք կազմակերպությունների, որոնք պայքարում են փոքրամասնությունների իրավունքների համար, ինչպես նաեւ հայտարարում է իր անմնացորդ աջակցությունը` Հայաստանում վտանգավոր պայմաններում բնակվող ԼԳԲՏ համայնքին:
