Չի բացառվում, որ մայիսի 4-ին Հանրապետության հրապարակում փուչիկների պայթյունից առավել ծանր այրվածքներ ստացած քաղաքացիներից ոմանց տեղափոխեն արտերկիր` վիրահատության նպատակով: Այս պահին Գերմանիայից Հայաստան հրավիրված Հեյդելբերգ քաղաքի Համալսարանական կլինիկայի պլաստիկ, վերականգնողական վիրաբուժության եւ այրվածքների կենտրոնի պրոֆեսոր Ադրիան Դայգլերը զննում է հիվանդներին: Ինչպես Aravot.am-ին հայտնեցին առողջապահության նախարարությունից, այսօր երեկոյան առողջապահության նախարար Հարություն Քուշկյանի եւ գերմանացի պրոֆեսորի հանդիպումից հետո պարզ կլինի, թե քանի հոգու կտեղափոխեն կամ առհասարակ դրա անհրաժեշտությունը կլինի՞, թե՞ ոչ:
Նշենք, որ այս պահի դրությամբ, մայրաքաղաքի հիվանդանոցներում դեռեւս բուժօգնություն է ստանում 54 մարդ, որից 2-ը վերակենդանացման բաժանմունքում են:
Այրված քաղաքացիների բուժման ծախսերը պետությունն է հոգում: Մեր հարցին, արդեն հաշվարկե՞լ են, թե որքան գումար կպահանջվի այդ քաղաքացիների բուժումը արտերկրի կլինիկաներում կազմակերպելու համար, նախարարությունից հայտնեցին, որ վաղն արդեն պարզ կլինի:
Հիշեցնենք, որ հարյուրավոր քաղաքացիներ մարմնի տարբեր մասերում այրվածքներ ստացան ՀՀԿ-ի նախընտրական համերգ-հանրահավաքի ժամանակ:
Լուսինե ԲՈՒԴԱՂՅԱՆ
