Ամենայն հավանականությամբ, օրերս Հայ ազգային կոնգրեսը կլքի նաև դաշինքի անդամ կուսակցություններից «Հայրենիք և պատիվ»-ը, որը մի քանի օր առաջ քաղխորհրդի նիստ է անցկացրել, իսկ վաղն էլ անցկացնելու է կուսակտիվի նիստ: Այս մասին Tert.am –ին հայտնեց «Հայրենիքն ու պատիվ» կուսակցության նախագահ Գառնիկ Մարգարյանը:
Միակ տարբերակը, որ կուսակցությունը կմնա Կոնգրեսում, կախված է նրանից, թե ՀԱԿ-ը կընդունի՞ «Հայրենիք և պատիվ» կուսակցության առաջարկները, որոնք վաղվա նիստից հետո ներկայացվելու են:
«Կլսե՞ն մեզ, կգնա՞ն մեր մատնանշած ճանապարհով, գնանք այդ ճանապարհով: Չեն ուզի՝ Աստված իրենց հետ»,-ասաց Գառնիկ Մարգարյանը:
Քաղաքական ուժի ղեկավարը հավելեց, որ ոչ միայն մնալ-չմնալու հարցեր են քննարկվելու, այլ ընդհանրապես. ինչ պետք է անեն «էս իրավիճակում»:
Կարդացեք նաև
Հիշեցնենք, որ «Հայրենիք և պատիվ» կուսակցությունը, ի թիվս այլոց, դեմ էր խորհրդարանական ընտրություններին մասնակցելուն՝ համարելով, որ դա անիմաստ է «մի երկրում, որտեղ ինչ թվեր ուզում՝ նկարում են»:
Գառնիկ Մարգարյանը հիմա էլ դեմ է ՀԱԿ–ի՝ մանդատները վերցնելուն:
Հեռացողների հետևից արված «խոսակցությունները» Գառնիկ Մարգարյանը համարում է կամ շանտաժ, կամ միամտություն:
«ՀԱԿ-ից գնացողների պատճառները շատ խորքային են, դրա մասին խոսելը վաղ է: Շաբաթ օրը կավարտենք, նոր ես կխոսեմ»,-ասաց «Հայրենիք և պատիվ» կուսակցության նախագահը:
թերթ.am
