Այսօր ասուլիսում այսպես արտահայտվեց ավանդական ուշուի Հայաստանի ֆեդերացիայի նախագահ Տիգրան Չոբանյանը:
«Ավանդական ուշուն, չնայած ՄՕԿ-ի նախագահ Ժակ Ռոգեի դիմադրությանը, 2020 թվականից դառնում է օլիմպիական մարզաձեւ: Իսկ դա թելադրում է, որ արդեն այսօրվանից պիտի մեր մարզաձեւին ավելի մեծ ուշադրություն հատկացվի: Իհարկե, եթե ցանկություն կա` օլիմպիական խաղերում ոչ միայն հաջող մասնակցել, այլեւ մեդալներ նվաճել: Մանավանդ, որ մեր մարզիկները միջազգային պաշտոնական բոլոր մրցաշարերից միշտ էլ վերադառնում են մեդալների հարուստ հավաքածուով: Այսօր մեր ֆեդերացիան պետությունից որպես աջակցություն ստանում է տարեկան 6 միլիոն դրամ: Դա սարսափելի քիչ է, եթե նկատի ունենանք, որ այդ գումարով մարզումներ, հավաքներ ենք կազմակերպում, անցկացնում ենք հանրապետության առաջնություններ, թիմեր եւ մարզիկներ գործուղում միջազգային ամենատարբեր մրցումներ: Մինչեւ համաշխարհային ճգնաժամը ֆեդերացիայի տարեկան բյուջեն 10 միլիոն դրամ էր: 2008-ին այն կրճատվեց 3 միլիոնով, իսկ մեկ տարի հետո` եւս մեկ միլիոնով: Ես այն ժամանակ եւ հիմա էլ դրա դեմ չեմ ընդվզում, որովհետեւ մտածում եմ, որ երկիրը հիմա ի վիճակի է այդքան հատկացնել: Մեր մարզաձեւն այնքան էլ ծախսատար չէ: Բայց եթե հնարավոր լինի նախկին ֆինանսավորումը վերականգնել, լիովին բավարարված կլինենք»:
Aravot.am-ը հետաքրքրվեց, թե ՀԱՕԿ-ը, որ օգնում է բոլոր մարզաձեւերին արդյոք ուշուի ֆեդերացիային չի՞ աջակցում, Տիգրան Չոբանյանը պատասխանեց. «Մեր ազգային օլիմպիական կոմիտեն միշտ բարեհաճ է մեր հանդեպ, բայց ոչ ավելին: Մենք աջակցություն ստանում ենք սպորտի պետական կառույցից»: Իսկ ի պատասխան մեր հարցին, թե երբեւէ դիմե՞լ են օլիմպիական կոմիտեին, ֆեդերացիայի նախագահն ասաց. «Անկեղծ ասած, չենք դիմել: Գուցե, ճիշտ չեմ մտածում: Բայց ես իմ էությամբ հպարտ մարդ եմ»:
Աշոտ ՀԱԿՈԲՅԱՆ
Կարդացեք նաև
