Ջերմուկ քաղաքում միայնակ ապրող 76-ամյա Արփիկ Ենոքյանին մայիսի 14-ին տանը մահացած են գտել: Կնոջ զավակներն արտերկրում են, թոռը՝ ժամկետային ծառայության մեջ : Արփիկի որդին՝ 53-ամյա Արսեն Խաչատրյանը դեպքի կապակցությամբ մայիսի 16-ին Ռուսաստանից եկել է Ջերմուկ: Արսենը մեզ հայտնեց, որ տնից գողացել են սեյֆում պահված ոսկեղենը, մոր վզի շղթան,ականջօղերը, սեյֆում եղած 1000 եվրոն, 15 հազար ռուսական ռուբլին եւ դրամ, որի չափը ինքը չգիտի: Անհետացել են նաեւ կնոջ եւ թոռան բջջային հեռախոսները, խաղամիջոց-համակարգիչը, բնակարանի եւ սեյֆի բանալիները: Որդու խոսքերով՝ մոր ձեռքի մատանին չեն կարողացել հանել, կնոջ այդ ձեռքին կապտուկներ կան: Արփիկ Ենքոյանի կողքին բարձ է դրված եղել, ատամի պրոթեզը եղել է ջարդված :
– Մայրս շատ զգույշ էր, երեկոյան 8-ից հետո դուռը չէր բացում, 8-9-ից հետո նույնիսկ հեռախոսազանգերին չէր պատասխանում,- ասում է Արսեն Խաչատրյանը:
Դիահերձումը ցույց է տվել, որ կնոջ կենսական օրգաններն առողջ են եղել, միայն թոքերն են պատռված, սեւացած, հավանական է՝ դա շնչահեղձության հետեւանք է: Արսեն Խաչատրյանն ասաց, որ ոստիկանությունը փորձում է գործը ներկայացնել որպես բնական մահ: Մահացած կնոջ հարազատների վկայությամբ՝ Ջերմուկի ոստիկանապետ Աշոտ Խաչատրյանը լինելով դեպքի վայրում՝ մահացածի հարազատներին ասել է, թե նրանք ինչու են իրար խառնվել, տարեց կին էր, տանը իր համար դեղ է որոնել, մահացել է: Երբ հարազատները նրան հարցրել են թանկարժեք իրերի ու փողի գողության մասին՝ ոստիկանապետը նրանց հակադարձել է, թե գուցե իրենք են տարել դրանք:
Կնոջ դատաբժշկական փորձաքննությունը կատարվել է Եղեգնաձորում, մահացածի հարազատները չվստահելով դրանց արդյունքներին՝ Երեւանից մասնագետներ են հրավիրել; Վերջիններս լինելով Եղեգնաձորում՝ իրենց հետ մայրաքաղաք են տարել փորձաքննության նմուշները:
Կարդացեք նաև
Դեպքից 3 օր հետո՝ մայիսի 17-ին զանգահարեցինք Ջերմուկի ոստիկանապետ Աշոտ Խաչատրյանին: Նա ասաց, որ դեպքի կապակցությամբ քրեական գործ չի հարուցվել, քանի որ հանցակազմ չի հայտնաբերվել, որ իրենք դիտարկում են կնոջ հանկարծամահության վարկածը: Ոստիկանապետի խոսքերով՝ դատաբժշկական փորձաքննության արդյունքներով կորոշվի քրեական գործ հարուցելու կամ չհարուցելու հարցը:
Ոսկան ՍԱՐԳՍՅԱՆ
