Հատված Հանրապետական կուսակցության խորհրդի անդամ, ԱԺ պատգամավոր Հովհաննես Սահակյանի հետ հարցազրույցից:
–Ինչպե՞ս եք գնահատում դաշնակցական մի քանի պատգամավորների քայլը, ովքեր օրերս ուղղակիորեն աջակցեցին DIY ակումբում պայթյուն կազմակերպելու մեջ մեղադրվող երկու երիտասարդներին:
-Որպես քաղաքացի ողջունում եմ այդ երիտասարդներին, նաեւ ցանկացած օրինական միջոցներով ու մեթոդներով բոլոր արատավոր երեւույթների դեմ մղվող պայքարը: Գուցեեւ այս երիտասարդների գործողությունները մի փոքր ավելի կտրուկ ու ագրեսիվ են եղել, սակայն պետք է հաշվի առնել նրանց տարիքը: Այդ տարիքում բոլորս էլ շատ ավելի անկառավարելի եւ հանդուգն ենք եղել:
Ինձ համար շատ ավելի կարեւոր է, որ այդ երիտասարդները գիտակցում են իրենց հայ լինելը, զգում են ազգային արմատները եւ չեն հանդուժել, որ ազգայինը խաթարող արատները չափից դուրս դրսեւորում ունենան:
Միանգամայն ողջունում են նաեւ ազգային արժեքների պահպանման նախանձախնդիր եւ այս հարթությունում մեր մշտական գործընկեր Դաշնակցության պատգամավորների քայլերը:
Միաժամանակ անհրաժեշտ եմ համարում ընդգծել, որ բոլոր երկրներում կան երիտասարդական խմբեր, որոնք իրենց հասու միջոցներով պայքարում են հոռի երեւույթների, ազգային ու հասարակական արժեքներին սպառնացող շեղումների ու հիվանդագին դրսեւորումների դեմ: Բոլոր, նույնիսկ ամենաժողովրդավարական ու եվրոպական երկրներում երիտասարդների այս խմբերին սատարում են ազգային ու պահպանողական առողջ ուժերը:
Աղանդների ու սեռական շեղումներ ունեցող խմբերի դեմ նույնիսկ շատ ավելի կոշտ միջոցներով է հարկավոր պայքարել, քանի որ այս երեւույթները մեզանից քաղաքացիներ են խլում, հայ մարդուն են այլասերում: Հայ առողջ մարդու հոգեւոր ու զգայական ներաշխարհին, աշխարհընկալմանը խորթ, անընդունելի ու անհանդուրժելի երեւույթների դեմ յուրաքանչյուրս էլ կարող ենք կտրուկ եւ կոշտ դրսեւորումներ ունենալ:
Արդյունքը հանցանք թե զանցանք կլինի՝ կորոշի օրենքը: Համենայն դեպս, արատավոր երեւույթների դեմ պայքարը մեզանում չափազանց դրսեւորումներ չի ունեցել, զոհեր չեն եղել:
Հասկանալի է, որ այս երիտասարդները ծայրահեղ քայլի են դիմել, բայց նաեւ ողջունելի է, որ գործնական քայլ են կատարել եւ չեն բավարարվել ինտերնետային գնահատականներով: Թեկուզ մարգինալ, բայց այս երիտասարդները նաեւ հայրենասերներ են: Իսկ սա նշանակում է, որ մեր երիտասարդները գիտակցում են, թե մեր երկիրը տարածաշրջանային ինչ վիճակում է եւ հարկ եղած դեպքում ինչ է հարկավոր անել:
Միաժամանակ կոչ եմ անում՝ կտրուկ քայլերից անցնել ավելի մտածված ու կշռադատված գործողությունների:
Գեւորգ ՀԱՐՈՒԹՅՈՒՆՅԱՆ
«Հայոց աշխարհ»
