ՀԱԿ առաջնորդ Լեւոն Տեր-Պետրոսյանը հանրահավաքում հայտարարեց, որ գուցե իր կրթությունը չի ներում, բայց իր համար անհասկանալի է «Ժառանգության» վարքագիծը: Այսօր «Հայացք» ակումբում Aravot.am-ը ընտրական տեխնոլոգիաների փորձագետ Արմեն Բադալյանից հետաքրքրվեց՝ Ձեզ համար հասկանալի՞ է նախընտրական եւ հետընտրական այս շրջանում ի՞նչ է անում «Ժառանգությունը» եւ ի՞նչ է ուզում: Նա պատասխանեց. «Կա 2 ժառանգություն՝ 2007 եւ 2012 -ի: Նախկին խմբակցոււթյունը բավական լավ աշխատեց, վրացական համարների ունեցողների շահերն էին պաշտպանում, սոցիալական խնդիրներ լուծում: Այդ ժառանգությունը ավարտվեց, հիմա նոր ժառանգություն է, Ազատ դեմոկրատներն են, ՀՀՇ-ից դուրս եկածները: Հիմա Ժառանգության խնդիրն ուրիշ է, փորձում է ձեւավորվել որպես ընդգծված արեւմտամետ ուժ, պրոեկտ են ստեղծում, ինչքանով կհաջողվի՝ չգիտեմ, բայց ուզում են, որ 2017-ին թե իշխող ուժը, թե իշխանությունը լինի նույն աշխարհաքաղաքական մտածելակերպից»:
Հարցին՝ Վարդան Օսկանյանի մուտքը ԲՀԿ-ն նույնպես կարո՞ղ է դարձնել արեւմտամետ՝ Արմեն Բադալյանը պատասխանեց. «ԲՀԿ-ն որպես քաղաքական ուժ վերջնականորեն չի ձեւավորվել, տեսք չի ստացել, կախված է՝ կոալիցիա կմտնի, որակ կփոխի՞, թե՞ չէ: Վարդան Օսկանյանից ընդամենը երանգ ստացավ, բայց դա շատ քիչ է»:
Անդրադառնալով Վիկտոր Դալլաքյանին՝ փորձագետը նշեց. «Վիկտոր Դալլաքյան ասելով՝ հիշում ենք՝ «Կոնը 50 հազար ա»: Դե հիմա Վիկտոր Դալլաքյան, գնա հիշի, թե կոնը քանի հազար ա»:
Հռիփսիմե ՋԵԲԵՋՅԱՆ
