Մհեր Մկրտչյանի անվան արտիստական թատրոնը «Կայսրը» ներկայացումով Գեղարքունիքի մարզկենտրոնում էր:
Գավառի մշակույթի տան 500 հոգանոց դահլիճը գրեթե լեփ-լեցուն էր: Հանդիսատեսը առանձակի ջերմությամբ ու կարոտով ընդունեց եւ ներկայացումը, եւ արտիստներին:
Ինչպես «Առավոտին» տեղեկացրեց թատրոնի տնօրեն Էդգար Բադալյանը` Լեւոն Շանթի համանուն երկի հիման վրա է բեմադրվել «Կայսրը» ներկայացումը: «Այս բեմադրության վրա աշխատել է Մհեր Մկրտչյանը, սակայն անավարտ մնաց նրա ցանկությունը, եւ մենք այսօր կարողանում ենք իրականացնել մեծ արտիստի անավարտ երազանքը: Պիեսը բեմադրվել է Գառնիկ Սեյրանյանի եւ Ալբերտ Մկրչյանի կողմից»,- նշեց Է. Բադալյանը:
Կարդացեք նաև
«Կայսրը» բեմադրությունը մայրաքաղաքից դուրս առաջին անգամ ներկայացվեց Գավառում, որից հետո կշարունակվի ցուցադրվել նաեւ մյուս մարզերում: Բեմադրության մեջ ընդգրկված են թատերախմբի 20 դերասաններից 13-ը:
Թատրոնի տնօրենն իր խոսքում նշեց, որ Գավառի հասարակությունը գնահատում է թատրոնն ու սիրով այցելում ներկայացումներին, համեմատած որոշ քաղաքների` այստեղ շատ ջերմություն ու բարձր գնահատական կա:
Իսկ թատրոնի տոմսի մասին Է. Բադալյանն ասաց, որ Երեւանում մուտքի տոմսերն ավելի բարձր արժեք ունեն, իսկ շրջաններում տոմսի արժեքը գնահատելիս հաշվի է առնվում բնակչության վճարունակությունը:
Ներկայացումը դիտելու եկած Բյուրեղիկ Հովեյանը «Առավոտի» հարցին պատասխանեց, որ մեծ բավականություն ստացավ բեմականացումից եւ երկուսուկես ժամը բավարարեց արվեստասերին: Հանդիսատեսներից շատերը նշեցին, որ հազար դրամը իրենց համար թանկ չէ եւ կցանկանան ամիսը մի քանի անգամ թատրոն այցելել:
Անի ՊՈՂՈՍՅԱՆ
