ՀԱԿ-ի մաս կազմող կուսակցությունները ժամանակին «Ժառանգությանը» խորհուրդ էին տալիս հանձնել մանդատները՝ ավազակապետությունը չլեգիտիմացնելու համար: Aravot.am-ը «Նոր ժամանակներ» կուսակցության նախագահ Արամ Կարապետյանից հետաքրքրվեց՝ ե՞րբ էին ՀԱԿ-ի անդամները ճիշտ ՝ այն ժամանակ սխա՞լ խորհուրդ էր տալիս, թե՞ հիմա է սխալ անում, որ Կոնգրեսը մանդատները վերցնում է: Պարոն Կարապետյանը պատասխանեց. «Դա պարադոքսների մեջ է մտնում մեր երկրի: Ոնց հարմար է, այդպես էլ խորհուրդ են տալիս: Քաղաքագիտական առումով այս պարագայում ճիշտը մանդատները դնելն էր: Հայաստանում ստեղծված իրավիճակի համար գոնե ժողովրդին հոգեբանորեն պատրաստելու այն հարցում, որ Հայաստանում ամեն ինչ անցավ մեծ խախտումներով եւ այդ խորհրդարան գնալն անիմաստ է՝ իմ տեսակետից, քաղաքագիտական առումով մանդատները դնելն էր ճիշտ: Այն ժամանակ իրենք ճիշտ էին խորհուրդ տալիս «Ժառանգությանը»:
Արամ Կարապետյանը համոզված է, որ, միեւնույն է, այդ 7 մարդը խորհրդարանում որեւէ բան չի կարողանալու փոխել, այսինքն՝ արդյունավետ չի լինելու. «Ժողովրդական շարժման համար գոնե բացատրություն կլիներ, որ դա ձեր քվեն է, բայց քանի որ ձեր քվեն ճիշտ չի հաշվվել, կեղծիք է եղել, այս պարագայում մենք չենք կարող այս քվեն վերցնել, որովհետեւ պիտի փոխենք անպայման: Պայքար, պայքար մինչեւ վերջը պիտի դարձնեին լուրջ թեմա եւ ասեին, որ նույնիսկ պատրաստ ենք մեր ձեռք բերած քվեից, որը տալիս է անձնական որոշակի բարիքներ, հրաժարվում ենք, որովհետեւ Հայաստանում ոչ բոլորի քվեն է տեղ հասել: Ձերը միգուցե այսքանով հասել է, բայց մնացածինը՝ 90 տոկոսինը չի հասել: Ո՞նց կարելի է գնալ խորհրդարան, այսինքն՝ արհամարհել մնացածի ձայնը»: Արամ Կարապետյանը վստահեցրեց, որ եթե ՀԱԿ-ը իրենցից հարցներ՝ նույնիսկ քաղաքական ամբողջ պլատֆորմը ցույց կտային, այն էլ՝ ձրի:
Հռիփսիմե ՋԵԲԵՋՅԱՆ
Կարդացեք նաև
