Անդրեաս Ղուկասյան
«Արդեն իշխանությունների կողմից որոշ քաղաքական գործիչներ են գործուղվել հասարակություն, որպեսզի վերահսկեն հասարակական այն շարժումները, որոնք ինքնակազմակերպվում են: Չեմ ցանկանում անուններ տալ, սակայն կարող եմ ասել, որ դրանք ընդդիմադիր դաշտից են»,-այսօր լրագրողների հետ հանդիպման ժամանակ հայտարարեց «Համագործակցություն հանուն ժողովրդավարության» կենտրոնի նախագահ Ստեփան Դանիելյանը: Նա նաև հավելեց, որ ընդդիմության մի զգալի հատված եղել է իշխանական հատվածի հենարանը և եթե չլիներ ընդդիմությունը, ապա իշխանությունը չէր կարող հասնել այն ամենին, ինչ ունի: Ս. Դանիելյանը փաստեց, որ Հանրապետական կուսակցությունն էլ ժամանակին եղել է ընդդիմություն: Պարոն Դանիելյանը նաև նշեց, որ այս ընտրությունները 1991-ից հետո ամենալավ ընտրություններն էին:
Կոալիցիոն զարգացումների մասին էլ Ս. Դանիելյանը հետևյալ կարծիքը հայտնեց. «Հանրապետական կուսակցությունը ռեալ հիմքեր ունի միայն ԲՀԿ-ի հետ կոալիցիա կազմելու համար: Դրա հիմնական նպատակն այն է, որ 2013-ի նախագահական ընտրություններում Սերժ Սարգսյանը որևէ լուրջ ընդդիմադիր թեկնածու չունենա»:
Դառնալով նախագահական ընտրությունների հավանական թեկնածուներին՝ Ս. Դանիելյանը նշեց. « Առաջին սցենարով կլինի միայն մեկ՝ իշխանական թեկնածու, կամ կլինի իշխանական թեկնածու և հասարակության թեկնածու»:
Քաղաքագետ Անդրեաս Ղուկասյանն էլ նույն հարցի կապակցությամբ նշեց. «Վախի մեջ ապրող հասարակությունը չի կարող ազատ լինել: Ըստ ձեզ՝ վախեցած մարդիկ կարո°ղ են ընտրել մեկին, բացի Սերժ Սարգսյանից: Բնականաբար ՀՀ նախագահական ընտրություններին այլ թեկնածուներ պիտի մասնակցեն, սակայն այս պահին հասարակության թեկնածու չեմ տեսնում և հասարակության մեջ չեմ տեսնում ներուժ նման ինքնակազմակերպվածություն ցուցաբերելու համար»: Ա. Ղուկասյանը կարծում է, որ 2013 թվականի նախագահական ընտրություններում Ռ. Քոչարյանը կառաջադրվի՝ ԲՀԿ-ի հիմքերի վրա՝ հաշվի առնելով այդ կուսակցության հավաքած ձայների ծավալը:
Կարդացեք նաև
Տաթև ՀԱՐՈՒԹՅՈՒՆՅԱՆ
