ՀՀ ոստիկանության քննչական գլխավոր վարչության Շիրակի մարզի քննչական բաժնի քննիչ Հ. Պողոսյանը երեկ «Առավոտին» գրություն էր ուղարկել՝ կապված 02. 05. 2012թ. «Aravot. am» կայքում տեղադրված «Գյումրիում ընտրակաշառք բաժանում են համատարած» հոդվածի հետ:
Քննչական բաժինը տեղեկացնում է, որ նախապատրաստված նյութերով հիմնավորվել է, որ «Որեւէ անձի կողմից չի խոչընդոտվել որեւէ ընտրողի կամքի ազատ իրականացումը, այսինքն՝ ՀՀ ԱԺ պատգամավորների 06.05. 2012թ. կայանալիք ընտրություններին թեկնածուներից որեւէ մեկի օգտին կողմ կամ դեմ քվեարկելու, ընտրություններին մասնակցելու կամ ընտրություններին մասնակցելուց հրաժարվելու պայմանով Գյումրիի Անի թաղամասի Սբ. Հակոբ եկեղեցու հարեւանությամբ գտնվող «Նոր Անի» համատիրությունում, դրա շրջակայքում, նշված թաղամասի նախակրթարաններում, դրանց շրջակայքերում, Բուլվարային եւ Շատրվաններ կոչվող թաղամասերւմ որեւէ ընտրողի կաշառք չի առաջարկվել, չի տրվել, եւ այդ նպատակով ցուցակներ չեն կազմվել»:
ՀՀ ոստիկանության Շիրակի մարզի քննչական բաժինը նախապատրաստած նյութերով որոշում է կայացրել քրեական գործ չհարուցելու, քրեական հետապնդում չիրականացնելու մասին:
«Առավոտ» օրաթերթ
