Սյունիքի թիվ 37 ընտրատարածքում մեծամասնական ընտրակարգով առաջադրված պատգամավորության թեկնածու, Գորիսի նախկին քաղաքապետ Սամվել Հարությունյանը մայիսի 6-ին կայացած խորհրդարանական ընտրությունների արդյունքները պատրաստվում է վիճարկել ՀՀ Սահմանադրական դատարանում:
Հիշեցնենք, որ այդ ընտրատարածքից պատգամավոր է ընտրվել ՀՀԿ-ի կողմից առաջադրված, Սյունիքի մարզպետի հովանավորությունը վայելող Հայկ Գրիգորյանը:
Սամվել Հարությունյանն այսօր արդեն իր դիմումը ներկայացրել է ՀՀ ՍԴ: Նա փաստեր է ներկայացնում նախընտրական եւ ընտրությունների շրջանում քարոզչության խախտումների, պետական լծակների՝ ՀՀԿ-ի օգտին կիրառման, ՀՀԿ-ի եւ նրա թեկնածու Հայկ Գրիգորյանի օգտին մեկ ձայնի դիմաց բաժանված 20 հազար դրամ ընտրակաշառքի ու դրանց վերաբերյալ թիվ 37 ԸԸՀ-ի անգործության, անհետացող թանաքների եւ «կառուսելի», ուռճացված ցուցակների
վերաբերյալ:
Կարդացեք նաև
Նրա հիմնական «խաղաքարտը», սակայն, այն է, որ ընտրական գործընթացն ի սկզբանէ կազմակերպվել է օրենքի խախտումով, մասնավորաբար, իբրեւ պատգամավորության թեկնածու գրանցելով առողջապահության նախկին փոխնախարար Թաթուլ Հակոբյանին: Հիշեցնենք, որ վերջինս տեւական ժամանակ աշխատում է Առողջապահության համաշխարհային կազմակերպությունում եւ հիմնականում բնակվում է Դանիայի թագավորությունում: Մինչդեռ ՀՀ սահմանադրությունը պահանջում է, որ ընտրություններին իբրեւ թեկնածու մասնակցող ՀՀ քաղաքացիները վերջին հինգ տարիները մշտապես բնակված լինեն Հայաստանում: Այս հարցը Սամվել Հարությունյանը դեռ նախընտրական շրջանում վիճարկեց, սակայն ՀՀ անձնագրային եւ վիզաների վարչությունը երկու անգամ մերժեց Սավել Հարությունյանի դիմումը՝ անվավեր ճանաչելու նույն վարչության Երեւան քաղաքի Նոր-նորքի բաժանմունքի կողմից Թաթուլ Հակոբյանին տրված վերջին հինգ տարիներին ՀՀ-ում մշտապես բնակության մասին տեղեկանքը: Ավելի ուշ, ՀՀ վարչական դատարանն էլ մերժեց Սամվել Հարությունյանի՝ թիվ 37 ԸԸՀ-ի որոշումը՝ Թաթուլ Հակոբյանին պատգամավորության թեկնածու գրանցելու մասին որոշումը, անգամ չանրադառնալով Թաթուլ Հակոբյանին տրամադրված տեղեկանքում առկա տեղեկությունների արժանահավատության հարցին:
Ավելի ուշ Arvot.am-ին տրված հարցազրույցում Սամվել Հարությունյանը կարծիք էր հայտնել, որ Թաթուլ Հակոբյանին «խաղի մեջ» է մտցրել ՀՀ նախագահի եղբայրը՝ Սաշիկ Սարգսյանը՝ իրենից «ձայներ խլելու համար»:
Նելլի ԳՐԻԳՈՐՅԱՆ
