Մամուլի տեղեկությունների համաձայն, նորընտիր պատգամավորներն արդեն սկսել են ետ բերել ընտրությունների ժամանակ ծախսած գումարները: Մասնավորապես, Սամվել Ալեքսանյանին պատկանող «Երեւան Սիթի»-ներում թանկացել են հատկապես այն ապրանքները, որը նա անձամբ է ներկրում:
«ՉԻ»- Այսպիսի մի անեկդոտ կա. երիտասարդ աղջկան հրավիրում են Թուրքիա՝ որպես դայակ աշխատելու, ու մի շաբաթ անց սա նամակ է գրում ընկերուհուն. «Լսի՛, էս ապուշները փոխանակ տեղ հասնելուս պես անձնագիրս խլեն եւ ինձ ուղարկեն հասարակաց տուն՝ իսկականից աշխատանքի տեղավորեցին որպես դայակ, հիմա ի՞նչ անեմ»: Սամվել Ալեքսանյանը, ի տարբերություն «էն ապուշների», չի հիասթափեցրել իր ընտրողներին. արել է այն, ինչ պիտի աներ, եւ ինչի մասին բոլորը գիտեին: Եվ եթե որեւէ մեկը նրանից այլ բան էր սպասում, դա արդեն այդ մարդու պրոբլեմն է: Ինչ է, նա ընտրողներին խոստացել էր, որ չի՞ թանկացնելու իր ներկրած ապրանքները , կամ գուցե Հայաստանի տարածաշրջանային ինտեգրացիայի ծրագրե՞ր էր ներկայացրել: Իհարկե ոչ: Մարդը գործարար է, գումար է ներդրել՝ պիտի «հետ բերի», այնպես որ՝ ամեն ինչ ճիշտ է: Հայաստանի չափանիշներով:
«Չորրորդ ինքնիշխանություն»
