Դաշնակցության անդամներ Արծվիկ Մինասյանն ու Հրայր Կարապետյանը 1 միլիոն դրամ են գրավ դրել օրեր առաջ համասեռականների հավաքատեղի դարձած DIY ակումբը պայթեցրած երիտասարդներից մեկին՝ Արամեին 2 ամսով ազատելու համար: Այսօր այս մասին ասուլիսում ասաց ակումբի սեփականատեր Արմինե Օգանեսովան. «Երեկ փակ դատավարություն է եղել, դատավորը թույլ չի տվել, որ իմ փաստաբանը ներկա լինի, ու Արամեի փաստաբանը՝ Մելանյա Առուստամյանը վստահ Դաշնակցության երկու ներկայացուցիչների անուններ է տվել»:
Օգանեսովայի խոսքերով, իր ձեռքի տակ եղած բոլոր փաստերը տանում են նրան, որ իր ակումբը պայթեցնողների թիկունքում Դաշնակցականններն են կանգնած. «Ես վստահ եմ, որ «Երկիր մեդիա» հեռուստաընկերությանը տված հարցազրույցից հետո է այս ամենը տեղի ունեցել: Ես գնացել էի Թուրքիա՝ համերգի, ու ներկա եմ եղել միասեռականների պարադին, որն ինձ համար շատ հետաքրքիր էր. Հիմնական պատճառը սա էր, դրանից հետո «Երկիր մեդիան» ինձնից հարցազրույց վերցրեց ու կարելի է ասել՝ ինձ լավ խաբեցին՝ ասացին շատ կարեւոր քայլ եք արել, ուզում ենք լուսաբանել: Բայց որ տեսա, թե եթերում ոնց են աղավաղել ու ինձ դարձրել թշնամի… Իմ խնդիրները այդ հարցազրույցից հետո են առաջացել: Այս ամենը լավ պլանավորված էր»:
ՀՅԴ գերագույն մարմնի անդամ Սպարտակ Սեյրանյանը Aravot.am-ին ասաց, թե իմաստ չի տեսնում պարզաբանել Ա. Օգանեսովայի հայտարարությունները. «Որեւէ կուսակցական մարդ կարող էր փաստաբան լինել ցանկացած այլ հարցում, դա նշանակում է, կուսակցությունը պետք է մեկնաբանի՞: Ինչ-որ մեկի պնդումների վերաբերյալ մեկնաբանություն չեմ տալիս, չգիտեմ իրենց ձեռքի տակ ինչ փաստարկներ կան, որ մեկնաբանեմ, չունեմ բավարար տեղեկատվություն, որ կարողանամ եզրակացություններ անել»:
Արփինե ՍԻՄՈՆՅԱՆ
Կարդացեք նաև
