Մայիսի 25-ին հանրապետության բոլոր ավագ դպրոցներում կհնչի աշակերտների կողմից այդքան սպասված Վերջին զանգը: Ավարտելով դպրոցը՝ դեռահասները կկատարեն են ևս մեկ քայլ դեպի ավելի հասուն ու հետաքրքիր շրջան: Այդ ժամանակ է, որ մանկական մտածողությունը դեռ չմոռացած, նրանցից յուրաքանչյուրը կերտում է իր մտացածին ու լուսավոր ապագան:
Նոր շրջապատ, հետաքրքիր, բայց միեւնույն ժամանակ դժվար փորձություններ, ուսանողական ակտիվ կյանք, սիրած մասնագիտության խորացում. «Առավոտ երիտասարդականը» հետաքրքվեց, եւ տարբեր դպրոցների մի քանի շրջանավարտներից իմացավ, որ հենց այդ թվարկվածններն են հետաքրքում նրանց` դպրոցից հետո: Սակայն մինչ դեռահասները կերազեն, ծնողները ջանք ու եռանդ չեն խնայի վերջին զանգին իրենց երեխային Վերջին զանգի արարողությանը հավուր պատշաճի ներկայացնելու համար: Ցավով նշեմ, որ այդ «ներկայացումը» ծնողի վրա նստում է մի «կլորիկ գումար»: Շրջանավարտներից մեկի ծնողը, ով միայն անունն ասաց (Հերմինե- հեղինակ), մեզ հետ զրույցում նշեց, որ իրենք սեպտեմբերից արդեն իսկ սկսել են այսպես կոչված ֆոնդի գումար հավաքել: Ի դեպ, այն քիչ չէ` ամսական 5000 դրամ: Ինը ամսվա կտրվածքով այն ստացվում է 45.000 դրամ: Սակայն դա նվազագույնն է, քանի որ եղել են դպրոցներ, ովքեր, ըստ Հերմինեի, հավաքել են 7000-10.000 դրամ:
Ինչի՞ համար պետք է ծախսեն այս գումարը: Օրինակ՝ այն դպրոցում, որտեղ սովորում է նրա երեխան, գումարը հավաքել են միանման հագուստի, վերջին զանգի սցենարի, նկարահանման, ձայնի ապահովման համար: Հնարավոր խնջույքն ու ամենկարևորը` տնօրենի նվերը, որն ամենաթանկն ու տարբերվողը պետք է լինի, չի մտնում այդ գումարի մեջ:
«Դպրոց գնալիս մտածում ենք մեր երեխաների գրենական պիտույքների, վերջին զանգին` տնօրենի նվերի մասին»,– ասում է Հերմինեն:
Նրա հետ զրույցում նկատեցինք ևս մի տարօրինակ արտահայտություն` տետրի փող: Կարծեցինք՝ դպրոցի ավարտական քնությունների համար է: Սա ոչ հաստատեց ու ոչ էլ բացառեց ծնողը, սակայն մի բան նա համոզված գիտի` չնայած այս ամենին, Վերջին զանգ կյանքում մի անգամ է լինում. այն պետք է տպավորիչ, հիշվող եւ ուրախ անցնի:
Արամ Արարատյան
