«Իմ ղարաբաղցի տատը մի առակ էր պատմում՝ մարդու տունը նեղ ա լինում, ուզում է լայնացնի, Աստված ջան, ասում է, մի բան արա, տունս լենանա, Աստված ասում է՝ ինչքան տանը կենդանի ունես՝ հանի, տունդ կլենանա»,-այսօր «Հայելի» ակումբում ՀՀԿ վերընտրված պատգամավոր Մանվել Բադեյանի հետ բանավեճի ժամանակ պատմեց «Ազատ դեմոկրատներ» կուսակցության անդամ Անուշ Սեդրակյանը: Ըստ նրա, հենց այդպես են վերաբերվում մեր երկրին ՀՀԿ-ականները, եւ եթե բացեիբաց չի եղել բռնություն, լցոնումներ, ասում են՝ ընտրությունները լավ են անցել:
Մանվել Բադեյանի դիտարկմամբ՝ գնահատականները, որ ՀՀԿ-ն չի ընտրվել, էմոցիոնալ են կամ տեսական. «Ոչ մեկի համար գաղտնիք չէ, որ այս ընտրությունները տարբերվում էին իրենց թափացիկությամբ, մաքրությամբ եւ օրինականությամբ, դա իմ խոսքերը չեն, բոլոր դիտորդների խոսքերն են: Ընդդիմության գնահատականները կարեւոր չեն, նրանք ցանկացած ընտրության պարագայում պետք է ստանային 0-ին մոտիկ գնահատական: Ես համարում եմ՝ այդ 5-7 տոկոսը 0-ին մոտիկ է, դա էլ գաղափարակիրների արդյունքը, չէ, այլ տեխնոլոգիաների»:
Հռիփսիմե ՋԵԲԵՋՅԱՆ
