Բնապահպանության նախարարության Հայաստանի բնության թանգարանը երեկ կազմակերպել էր հայոց ազգային բանակի կազմավորման եւ Շուշիի ազատագրման 20-ամյակին նվիրված միջոցառում:
Թանգարանում ցուցադրվում էին նկարիչներ Վլադիմիր Գրիգորյանի եւ նրա տիկնոջ՝ Ֆլորա Բաղդասարյանի հրաշալի բնանկարները: Տնօրեն Գայանե Ղազարյանի կողմից նրանք արժանացան շնորհակալագրերի:
Հաղթանակի Եռատոնին հրավիրվել էին եւ մասնակցեցին Ազգային հերոսներ Մովսես Գորգիսյանի կինը՝ տիկին Ռուզաննան, եւ Վիտյա Այվազյանի կինը՝ տիկին Կարինեն, նրա դուստրն ու որդին:
Կարդացեք նաև
Գեներալ-մայոր Սամվել Սաֆարյանը ներկայացրեց, թե ինչպես սկսվեց պատերազմը, թե ինչպես եւ ինչ զենքով էին մեր առաջին կամավորները: «Արցախյան պատերազմին 6000 զոհ տվեցինք»,- հուզված ասաց նա:
Մանկագիր Հայկուշ Օհանյանը, որը նաեւ մահապարտի կին է, դատարկաձեռն չէր եկել. նա իր հետ բերել էր եւ Ազգային հերոսների կանանց նվիրեց «Ճերմակ աղավնիներ» գիրքը, մեկն էլ նվիրեց թանգարանին:
Հուզիչ էր, որ գիրքը ներկայացրեց արցախյան գոյամարտի կենդանի հերոսներից մեկը՝ Աղաբեկ Խաչատրյանը: Նա տեղեկացրեց, որ «Ճերմակ աղավնիները» հեղինակի թվով 8-րդ գիրքն է. «Այս գրքում հայ ժողովրդի, նրա ուժի հաղթանակն է»:
Առհասարակ, ազատամարտի մասնակիցները շատ չեն սիրում խոսել: Եթե խոսում էլ են, ապա խոսում են իրենց մարտական ընկերներից, նրանց հերոսապատումներից: Այդպես էր եւ Աղաբեկ Խաչատրյանը:
«Արծիվ» մահապարտների ջոկատի անդամ Սուսաննա Գալստյանն ասաց, որ եթե սկսի պատմել իր ընկերների մասին, դա «սերիալ կլինի»: Նա հիշեց, թե ինչպես 1992թ. դեկտեմբերի 2-ին Կապան էր գնացել 18 տոննա «բեռով»՝ զինամթերքով: Մտերիմները, որոնք գիտեին այդ մասին, հարցրել են. «Բա որ թուրքը խփի», իսկ տիկին Սուսաննան կատակով պատասխանել էր. «Թուրքը որ տեսնի՝ ես եմ, կվախենա՝ չի խփի»: Մի տեղ հուզիչ, մի տեղ կատակով տիկին Սուսաննան ներկայացրեց իր ընտանիքի պատմությունը. նրանցից 10-ը Արցախյան պատերազմի մասնակիցներ են եղել, ամուսինը, որդիները…
Ռուզաննա Գորգիսյանի համար ամեն անգամ Եռաբլուր բարձրանալը տանջալի է. «Ես կուզեի, որ այրու կարգավիճակով չլինեի, այլ ՀՀ քաղաքացու: Ամեն անգամ ամաչում եմ Եռաբլուրից: Պիտի, սակայն, գիտակցենք, որ պատերազմը ոչ միայն կրակոց է, այլեւ ոգի: Հայաստանում Արցախի դրոշն է բարձրացվում, ժամանակն է, որ Արցախն էլ Հայաստանի՝ որպես մեկ միասնական հայրենիքի դրոշ բարձրացնի»:
Գեներալ Արսեն Ֆիդանյանի համար պատերազմն իր հետքը թողել է երեխաների, թիկունքի դժվարությունները տարած մարդկանց վրա էլ:
Միջոցառմանը մասնակցում էին թիվ 2 ավագ դպրոցի դպրոցականները, իսկ նրանցից մի աղջնակ էլ բազուկը բարձր պահած կատարեց «Գետաշեն» հայրենասիրական երգը:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
