Ստամբուլի «Լյուֆթի Քիրդար» ցուցահանդեսների և համաժողովների անցկացման կենտրոնում այսօր կայանալու է փոփ երգերի հայ կատարող Նունե Եսայանի համերգը:
Նունե Եսայանի համաձայն, այս համերգը եղել է Ստամբուլում սպանված հայազգի լրագրող Հրանտ Դինքի ամենամեծ երազանքներից մեկը:
«Հուրիեթ» թուրքական պարբերականի վկայությամբ, կատարողը հանդես է եկել հայտարարությամբ, որի համաձայն «սահմանները քաղաքական պատճառներով փակ են, սակայն մեր սրտերն են բաց»:
«Չեմ կարծում, որ երաժշտության համար սահմաններ գոյություն ունեն», – պարբերականին տված հարցազրույցում նշել է Եսայանը՝ ասելով նաև, որ ինքը չի ճանաչում Թուրքիան և թուրքերին, ինչպես նաև պոլսահայությանը, և անհանգստանում է այն բանի համար, թե հանդիսատեսն ինչպես կընդունի իր համերգը:
Կարդացեք նաև
«Ստամբուլում ես անցկացնելու եմ չորս օր: Իմ մոտ ձևավորվել է Ստամբուլի մտովի մի պատկեր և չգիտեմ, արդյոք քաղաքը կհամապատասխանի այս պատկերին, թե ինձ ընդհանրապես շատ տարբեր անակնկալներ են սպասում: Բոլոր զբոսաշրջիկների նման, նախ և առաջ ցանկանում եմ տեսնել Սուրբ Սոֆիայի տաճարն ու Թոփքափի պալատը», – ասել է հայ երգչուհին:
Նունե Եսայանը նախկինում հայտնել էր, որ Թուրքիայում իր ելույթը 2007 թվականի հունվարի 19-ին սպանված հայազգի լրագրող Հրանտ Դինքի ամենամեծ երազանքներից է եղել:
«Ես եկել եմ Ստամբուլ՝ այս երազանքն իրականացնելու նպատակով», – ասել է երգչուհին:
«Թշնամանքի զգացումն անիմաստ է. նոր սերունդն այլևս չի մտածում հին սերունդի նման: Այո, Հայոց ցեղասպանությունը հսկա ցավ է պատճառել հայ ժողոցրդին, սակայն այն չի կարող կանխել դեպի ապագա նայելու մեր ձգտումը», – նշել է Նունե Եսայանը:
Հարցազրույցում երգչուհին հետաքրքրություն է հայտնել նաև մասնակցելու թուրք կատարողների հետ համատեղ համերգին ինչպես Թուրքիայում, այնպես էլ Հայաստանում և ասել, որ նման համերգը պետք է նվիրված լինի խաղաղ ապագային, որը նա «իրական հաղթանակ» է անվանել:
