«Առաջիկայում Թուրքիան կարող է վերանայել անցած տարեվերջին Ֆրանսիայի դեմ սահմանված պատժամիջոցների փաթեթի կիրառման նպատակահարմարությունը», – հինգշաբթի օրը Անկարայում հայտարարել է Թուրքիայի արտաքին գործերի նախարարության մամուլի խոսնակ Սելջուկ Ունալը։
Նա հատուկ ընդգծել է, որ թուրքական իշխանություններն այդ քայլին կդիմեն, երբ հստակ լինի, թե ինչ դիրքորոշում է որդեգրել ֆրանսիական նոր վարչակազմը Հայոց ցեղասպանության խնդրում:
Ունալը Անկարայում կայացած մամուլի ասուլիսի ժամանակ անդրադարձել է Ֆրանսիայի նորընտիր նախագահի նախընտրական այն խոստմանը, որի համաձայն` Ֆրանսուա Օլանդը կրկին պետք է շրջանառության մեջ դնի Հայոց ցեղասպանության ժխտման համար քրեական պատիժ սահմանող օրինագիծը:
«Մենք կհետեւենք, թե ինչ ընթացք կստանա այդ խոստումը` դիտարկելով նաեւ Ֆրանսիայի նոր կառավարության ձեւավորման ընթացքը: Ամեն դեպքում, մենք համոզված ենք, որ երկկողմ հարաբերությունների մակարդակը չի բխում ֆրանս – թուրքական 500-ամյա դիվանագիտական հարաբերությունների տրամաբանությունից», – նշել է թուրքական արտգործնախարարության խոսնակը:
Թուրքիայի վարչապետը եւս երեկ հայտարարել է, թե վստահ է, որ պաշտոնական Անկարայի եւ Փարիզի հարաբերություններում Նիկոլա Սարկոզիի` Ելիսեյան պալատը լքելուց հետո «նոր դարաշրջան կբացվի»: Այս մասին Ռեջեփ Էրդողանը հայտարարել է Ֆրանսիայի նորընտիր նախագահի հետ հինգշաբթի երեկոյան կայացած հեռախոսազրույցի ընթացքում:
Ինչպես տեղեկացնում է «Անադոլու» գործակալությունը, հեռախոսազրույցի նախաձեռնողը Թուրքիայի վարչապետն էր, որը ցանկացել է անձամբ շնորհավորել Ֆրանսուա Օլանդին:
«Ես հույս ունեմ, որ ձեր պաշտոնավարման օրոք Ֆրանսիան եւ Թուրքիան կկարողանան հաղթահարել այն արհեստական խնդիրները, որ ծագել են վերջին շրջանում եւ չեն համապատասխանում մեր երկու երկրների միջեւ ձեւավորված հարաբերությունների պատմությանը», – նշել է Էրդողանը:
Ֆրանսուա Օլանդը հատուկ ընդգծել է, որ Թուրքիան շարունակում է խիստ կարեւոր գործընկեր մնալ Ֆրանսիայի համար, եւ երկու պետությունները առաջիկայում եւս կհամաձայնեցնեն իրենց մոտեցումները միջազգային ասպարեզում: «Բացի այդ, Ֆրանսիան չի անտեսում այն հանգամանքը, որ Թուրքիան այսօր համաշխարհային տնտեսության ամենալուրջ դերակատարներից մեկն է», – ասել է Օլանդը:
Լրատվական գործակալությունները, սակայն, որեւէ տեղեկություն չեն հաղորդում` արդյոք Էրդողանի հետ հեռախոսազրույցի ընթացքում Օլանդը որեւէ կերպ անդրադարձե՞լ է հայկական խնդիրներին, թե՞` ոչ:
Ֆրանսուա Օլանդը ոչ միայն խոստացել էր կրկին շրջանառության մեջ դնել ցեղապանության մասին վիճահարույց օրենքը, այլեւ ապրիլի 24-ին մասնակցել էր Փարիզում գտնվող Կոմիտասի արձանի հարեւանությամբ ֆրանսահայության կողմից կազմակերպված հիշատակի միջոցառումներին։
Գեւորգ Ստամբոլցյան
«Ազատություն» ռադիոկայան
