ԵԺԿ նախագահ Ուիլֆրիդ Մարթենսը շնորհավորական ուղերձ էր հղել ՀՀԿ նախագահ Սերժ Սարգսյանին` ընտրություններին գերազանց հաջողություն արձանագրելու առիթով: Այս առնչությամբ այսօր Aravot.am-ը մեկնաբանություն խնդրեց ՀՀԿ փոխնախագահ, ԿԳ նախարար Արմեն Աշոտյանից: Նրա խոսքերով` «Ուիլֆրիդ Մարթենսի շնորհավորանքը մի կողմից ցույց տվեց եվրոպական քաղաքական վերնախավի եւ եվրոպական քաղաքական ինստիտուտների գոհունակությունը` անցած ընտրությունների որակի հետ կապված, վերահաստատեց պատրաստակամությունը աշխատել Հայաստանի հետ բարեփոխումների շարունակականության ուղղությամբ: Մյուս կողմից, այդ շնորհավորանքը նաեւ տրամաբանական շարունակությունն էր Հանրապետական կուսակցության համագումարին հղած իր ուղերձի, որտեղ համապատասխան քաղաքական շեշտադրումներն օրգանապես կապված են նաեւ Հայաստանի քաղաքական օրակարգի հետ»:
Ինչպես հայտնի է, ՀՀԿ-ի հետ ԵԺԿ դիտորդ անդամ է նաեւ «Ժառանգություն» կուսակցությունը, ուստի մեր հարցին` տեսնո՞ւմ եք «Ժառանգությանը» Ձեր կոալիցիայում, թե՞ չէ` պարոն Աշոտյանը պատասխանեց. «Գաղտնիք չէ, որ կոալիցիայի ստեղծման կարեւորագույն ելակետերից մեկը լինելու է գալիք նախագահական ընտրություններին Հանրապետական կուսակցության թեկնածուին սատարելու հարցը: Եթե «Ժառանգություն» կուսակցությունը դուրս կգա նման քաղաքական պլատֆորմով` պատրաստակամություն հայտնելով սատարել Սերժ Սարգսյանին գալիք նախագահական ընտրություններին, կարծում եմ, որ իրենց եւ մեր համագործակցության հեռանկարները կընդլայնվեն»:
Հռիփսիմե ՋԵԲԵՋՅԱՆ
