Այսօր մայրաքաղաքի 20 փողոցներում եւ 10 խաչմերուկներում տեղադրված տեսախցիկներն ու արագաչափերը ստիպում են վարորդին ավելի զգոն լինել, հետեւել լուսացույցին եւ «սպիդոմետրին»: Այսօր այս մասին, «Հայացք» ակումբում մամլո ասուլիսի ժամանակ հավաստիացրեց ճանապարհային ոստիկանության պետի տեղակալ, ոստիկանության գնդապետ Հայկ Սարգսյանը:
Նրա տվյալներով, տարեսկզբից մինչ օրս տեղի է ունեցել 685 ճանապարհատրանսպորտային պատահար, ինչի արդյունքում զոհվել է 73, վիրավորվել`168 մարդ: Համեմատած նախորդ տարվա ժամանակահատվածի հետ, պատահարների թիվը 63-ով աճել է: Սակայն զոհերի քանակը չի փոխվել, մինչդեռ վիրավորվածների թիվն աճել է 57-ով:Երեւանում պատահարների թիվը տեղադրված տեսախցիկներից եւ նկարահանող սարքերից հետո, անցյալ տարվա համեմատ բավականին նվազել է, հայտնեց պարոն Սարգսյանը: Այդուհանդերձ տեսախցիկների տեղադրման օրից ի վեր, գրանցվել է 48 հազար խախտում:
Գնդապետը նաեւ հայտնեց, որ վարչական իրավախախտման վերաբերյալ տեղի են ունեցել փոփոխություններ, որոնք կնպաստեն իրավախախտ վարորդներին գտնելու եւ տուգանքի ծանուցումը հասցնելու: Եթե նախկինում իրավախախտը տալիս էր հաշվառման հասցեն եւ ոչ թե փաստացի բնակման հասցեն,կամ այլ պատճառներով ուղարկված ծանուցումը նրան չէր հասնում, հաշվվում էր ծանուցումը չուղարկված, այժմ`անկախ վերոնշյալ հանգամանքներից, ծանուցումը համարվում է ուղարկված: Եթե վարորդը 30 օրվա ընթացքում չի կատարում վճարումը, տուգանքի չափը եռապատկվում է, 60 օրվա դեպքում`հնգապատկվում, 120 օրվա դեպքում գործերն ուղարկվում են դատարան:
Արագության գերազանցման պարագայում տուգանքի չափը սահմանված է հետեւյալ կերպ. արագության գերազանցում նշված արագությունից 11-20 կմ/ժամ ՝
10 000 դրամ, 21-40կմ/ժամ՝ 40 000 դրամ, 60 կմ/ժամ՝ 70 000 դրամ:
Կարդացեք նաև
Ընդ որում արագաչափը նկարահանում է ոչ միայն համընթաց, այլեւ հանդիպակաց ուղղությունը: Պարոն Սարգսյանի ներկայացմամբ, եթե մեքենան վարել է ոչ թե վարորդը, այլ մեկ ուրիշը,վարորդը պարտավորվում է այդ մասին տեղյակ պահել ճանապարհային ոստիկանությանը, եւ կազատվի տուգանքի վճարումից:
Գնդապետ Սարգսյանը տեղեկացրեց, որ մինչեւ տարվա վերջ եւս 20 փողոցում կավելացվի 30 արագաչափ, եւ 10 խաչմերուկում՝ նույնքան տեսախցիկ: Արագաչափ է տեղադրվելու նաեւ Երեւան-Սեւան մայրուղում:
Պարոն Սարգսյանը նշեց, որ կին վարորդները ավելի ուշադիր ու հետեւողական են եւ ավել քիչ խախտումներ են գրանցում, քան տղամարդ վարորդները:
Հերմինե ԱՎԵՏԻՍՅԱՆ
