Թուրքիայի վարչապետ Ռեջեփ Թայիփ Էրդողանը կոչ է արել մեկնարկել Ֆրանսիայի հետ հարաբերությունների «նոր դարաշրջան»:
Այս կոչով Թուրքիայի վարչապետը հանդես է եկել հինգշաբթի ուշ երեկոյան Ֆրանսիայի նորընտիր նախագահ Ֆրանսուա Օլանդին շնորհավորելու կապակցությամբ ունեցած հեռախոսազրույցի ժամանակ:
«Հուրիեթ» պարբերականի փոխանցմամբ, Էրդողանը հույս է հայտնել, որ Թուրքիայի և Ֆրանսիայի միջև հարաբերություններն այսուհանդերձ ազատ կլինեն «դրանց վրա ներկայում ազդեցություն գործող արհեստական հարցերից»:
«Վստահ եմ մեր հարաբերություններում նոր դարաշրջան մեկնարկելու հարցում», – ասել է Թուրքիայի վարչապետը Ֆրանսուա Օլանդի հետ ունեցած հարցազրույցում:
Կարդացեք նաև
Եվրոպական Միություն Թուրքիային ընդունելու դեմ հանդես եկող Ֆրանսիայի նախագահ Նիկոլա Սարկոզիի պաշտոնավարման ժամանակ Ֆրանսիայի և Թուրքիայի միջև հարաբերությունները բավականին լարված են եղել:
Հարաբերություններն է՛լ ավելի էին լարվել այն բանից հետո, երբ հունվարի 22-ին Ֆրանսիայի Սենատը քվեարկել էր Հայոց ցեղասպանության ժխտումը քրեականացնող օրինագծի օգտին, որը սակայն հետագայում հակասահմանադրական է ճանաչվել երկրի Սահմանադրական դատարանի կողմից:
Թուրքիան «մեծ անարդարություն» էր անվանել Ֆրանսիայի Սենատի կողմից օրինագծի ընդունումը՝ ասելով, որ նման գործողությամբ «անհարգալից վերաբերմունք է ցուցաբերվել Թուրքիայի նկատմամբ»:
Արմեն Հովհաննիսյան
«Ամերիկայի Ձայն»
