Հայրենական մեծ պատերազմի վետերանները նեղացած ու վրդովված են պետության վերաբերմունքից: Մայիսի 9-ին՝ Հաղթանակի օրվա կապակցությամբ, նրանց համար կազմակերպված մեծարման միջոցառումները վետերանները չեն կարողացել ինչպես հարկն է վայելել ու նշել, քանի որ չեն ստացել իրենց հասանելիք կենսաթոշակը:
«Առավոտի» հետ զրույցում վետերաններից մեկը պատմեց, որ չեն կարողացել իրենց շնորհավորելու եկած հարազատներին հյուրասիրելու համար գոնե մեկ շիշ գինի ու խմորեղեն գնել. «Թոռնիկներս եկել էին ինձ շնորհավորելու, բայց չկարողացա անգամ շոկոլադ նրանց հյուրասիրեմ իմ գումարով: Միմյանց շնորհավորելու փոխարեն էլ, հարցնում էինք՝ քո թոշակը տվե՞լ են: Իշխանությունները կարող էին, չէ՞, մի քիչ հոգատարություն դրսեւորել եւ տոնից առաջ մեր թոշակները տալ: Առանց այդ էլ մենք՝ պատերազմի մասնակիցներս, շատ քիչ ենք մնացել»:
Նրանց խոսքերով՝ ամեն ամիս իրենց թոշակները հատկացվում են ամսի 10-ին, 11-ին, սակայն տոնի առիթով վետերանները մեծ հույս են ունեցել, որ շուտ կստանան եւ նախատոնական գնումներ կանեն:
Լ. ԲՈՒԴԱՂՅԱՆ
Կարդացեք նաև
«Առավոտ» օրաթերթ
