Թիվ 8 ընտրատարածքի բոլոր ընտրատեղամասերից մեծ թվով անվավեր քվեաթերթիկներ են դուրս եկել, որոնց վրա ոչ թե սովորական նշում է կատարված եղել, այլ գրիչով 3 եւ 7 թվերն են գրված եղել: 3-ը մեծամասնական քվերաթերթիկի հանրապետական հաղթած թեկնածու Կորյուն Նահապետյանի համարն է, իսկ 7-ը` համամասնական քվեաթերթիկի ՀՀԿ-ի թիվն է:
Քվեաթերթիկի վրա գրիչով նման «գրառումները», ըստ Aravot.am-ի զրուցակցի` այս ընտրատարածքում պարտված ՀՅԴ-ի անդամ Արթուր Եղիազարյանի, ընդամենն այն բանի արդյունքն են, որ մարդկանց պարզապես ուղղորդել են, թե ում օգտին ձայն տան. «Ասել են` կգնաք 3 եւ 7 կընտրեք, մարդիկ էլ, չիմանալով, ձեռքով գրել են այն թիվը, որն իրենց ասել են: Սա ցույց է տալիս, որ մարդկանց ուղղորդել են»:
Պարոն Եղիազարյանի կարծիքով, նրանում, որ ժողովուրդն ուղղորդվել է, մեղավոր են նաեւ ընդդիմադիր գործիչները. «Նրանք ժողովրդին խրատ էին տալիս, ասում` մի վերցրեք, կամ վերցրեք, բայց ձեր խղճով քվեարկեք, կյանքը ցույց տվեց, որ այդպես չէ: 10 մարդկանցից 8-ը`այդպես չարեց»:
Չնայած, Արթուր Եղիազարյանը պարտվել է, սակայն իր ընտրապայքարը հաջողված է համարում. «Հաջողված եմ ինձ համար համարում ոչ թե արդյունքների առումով, այլ հավաքած ձայների: Ես հրապարակային անձ չեմ եղել, եւ դրանով հանդերձ 6500 ձայն եմ հավաքել: Մարդկանց որոշակի մասն ինձ ճանաչում է, բայց ոչ այնպես, ինչպես Կորյունին, որը Սամվել Ալեքսանյանի հետ խնամիական հարաբերությունների մեջ է. նա շատ արագ աշխատացրեց այդ տեխնոլոգիան: Իշխող կուսակցության աշխատող այդ մեքենան ազդեց նաեւ մեծամասնականի արդյունքների վրա, պայքարն առողջ չէր»:
Կարդացեք նաև
Իսկ հաղթած թեկնածուին, որը նաեւ գործող պատգամավոր էր, պարոն Եղիազարյանը հաջողություն մաղթեց. «Կուզեմ նրա աշխատանքը օգուտ բերի համայնքի համար: Բայց հետեւել եմ ու տեսել, որ նա, օրինակ, դեմ է արտահայտվել «Կենսապահովման նվազագույն զամբյուղի մասին» օրինագծին… այսինքն, կարող է այդպես չի մտածում, բայց իր կուսակցությունը` ՀՀԿ-ն, եթե որոշել է դեմ քվեարկել, ինքը դառնում է հերթական կոճակ սեղմողը: Հուսամ 5 տարում մի քիչ ողջամտություն կցուցաբերի, օգտակար աշխատանքով կզբաղվի»:
Նելլի ԲԱԲԱՅԱՆ
