Այսօր Aravot.am-ը Գյումրու ԳԱԼԱ հեռուստաընկերության սեփականատեր Վահան Խաչատրյանին հարցրեց, թե ՀԱԿ-ը խորհրդարանում կկարողանա՞ հակակշիռ դառնալ մեծամասնություն կազմած Հանրապետականին, պաշտպանել իր ընտրազանգվածի շահերը: «Փորձը ցույց տվեց, որ ՀԱԿ-ը վերջին երեք տարում չի հետապնդում էդ նպատակը` հակակշռել իշխանություններին, փորձում է այս կամ այն ուժերի հետ բանակցությունների մեջ մտնել և ապահովել իր տեղը արևի տակ: ՀԱԿ-ը վերջին 3 տարում չի աշխատում ժողովրդի հետ, և փորձում է ինտրիգների եղանակով աշխատել այս կամ այն քաղաքական ուժերի հետ: Սա շատ պարզ է, և եթե ժողովրդին դրել են չհասկացողի տեղ, սխալվում են, ժողովուրդը շատ լավ հասկանում է, ամեն ինչ իր աչքի առաջ է», -ասաց Վահան Խաչատրյանը:
Նա ԲՀԿ-ի` մեծ թվով ձայներ հավաքելը պայմանավորեց ժողովրդի թե՛ իշխանությունից և թե՛ ընդդիմությունից հիասթափված լինելով: « ժողովուրդը գնաց և ձայնը տվեց ԲՀԿ-ին, որը կոալիցիայի անդամ է, և միշտ քվեարկել է ժողովրդի շահերից չբխող օրենքների օգտին, կարծում եմ, սա բողոք էր իշխանությունների և ընդդիմության դեմ»: Aravot.am-ի մյուս հարցին էլ, թե ինչպե ՞ս է պատկերացնում խորհրդարանական աշխատանքները Սամվել Ալեքսանյանի ու Նիկոլ Փաշինյանի ներկայության դեպքում, հնարավո ՞ ր է դրանք ուղեկցվեն սկանդալներով, ինչպես որ նախընտրական քարոզարշավի ժամանակ էր, պարոն Խաչատրյանն ասաց. «Չէ, ես կարծում եմ, որ բոլորն էլ հասուն քաղաքական գործիչներ են, իսկ քաղաքական գործիչները կարողանում են և լեզու գտնել, և բանակցել, և առճակատվել: Լուրջ սկանդալներ չեն լինի, մանավանդ, որ չեմ կարծում, թե Սամվել Ալեքսանյանը հաճախի նիստերին»: ԳԱԼԱ-ի սեփականատերը նաև հույս հայտնեց, որ քաղաքական գործիչները փողոցային պայքարը կտարբերակեն պառլամենտական պայքարից, փողոցում ու խորհրդարանում համապատասխան պահվածք կդրսևորեն:
Նունե ԱՐԵՎՇԱՏՅԱՆ
